Isiginnaagassiaq 'Sanasoq Nissiararlu' takuteqqaarneqalersoq
Nunatta Isiginnaartitsisarfiata isiginnaartitsissusiat siullermeerlugit takutinneqartarnerat illoqarfinni assigiinngitsuni pisarnissaat siunertaraa. Isiginnaagassiaq juullerpalaartoq 'Sanasoq Nissiararlu' siullermeerlugu isiginnaartitsissutigineqarnera unnugu Ilulissani pissaaq.
Juullerpaluttumik isiginnaartitsissusiaq Norge-mit allaaveqarpoq, 'Sanasoq Nissiararlu' Norge-mi meeqqanit tamanit ilisimaneqarpoq. Ukiut tamaasa 1972-imiilli Norge-mi tv-kut aallakaatitassiaq 'Sanasoq Nissiararlu' takutinneqartarluni.
Nunatta Isiginnaartitsisarfiata 'Sanasoq Nissiararlu' quujanartunngorlugu Kalaallit Nunaannullu tulluartunngorlugu isiginnaartitsissusiaraat, taanna juullip tungaanut illoqarfinni arfineq pingasuni isiginnaartitsissutigissavaat.
Isiginnaartitsinermik Ilinniarfimmi ilinniartut tallimat 'Sanasoq Nissiararlu' isiginnaartitsissutigineqarnerani takutitseqqaassapput, taakkua saniatigut Nunatta Isiginnaartitsisarfiani isiginnaartitsisartut Else Danielsen aamma Makka Kleist takutitsissapput.
Sanasoq Nissiararluni Ilulissani kulturikkut illumi Sermermiuni unnugu aqagulu takutinneqassaaq. Ilulissani takutinneqareerpat, Kangaatsiami, Aasianni, Sisimiuni, Narsami Paamiuni, Qaqortumi naggataagullu Nuummi isiginnaartitsissutigineqassaaq.