Isertumi atuartut franskisut ilikkartut

Tassa arnaq franskeq atuarfimmi ilinniartitsisuuvoq. Fagit assigiingitsut ilinniartitsisutigisarpaai, franskisulli ilinniartitsineq ajorpoq.

Meeqqalli issangugisimammassuk, ilinniartitsisup anitsiarfinni franskisut ilinniartilaartalersimavai.

- Oqaatsinik ikitsunik ilinniartilaartalerpakka, soorlu bonjour, comment vas-tu, quel temps fait-il. Kisianni suunngitsuinnarmik ilinniartippakka, immaqa quleriaannarlugit, Anna Mornet frankrigimeersoq 46-nik ukiulik oqarpoq.

Aamma atuaruk Nakuusa e-bogimik meeqqanut saqqummersitsivoq

Meeqqat ilaata Mala Haraldsenip 12-nik ukiullip franskit oqaasii ilikkassallugit pissangarnartippai, taassumalu ilikkakkani tusartippai.

- Je m'appelle Mala, taana isumaqarpoq uanga ateqarpunga Mala, Mala Haraldsen oqarpoq nangillunilu.

- très bien merci isumaqarpoq ajunngilanga, Mala Haraldsen Isertormeersoq taama oqarpoq. Taanna Anna Mornetimiit franskisut ilikkarsimavoq.

Aamma atuaruk VIDEO Qanga juulliosiortarneq meeqqerivimmi oqaluttuarineqarpoq

Anna Mornetip Kalaallit Nunaat sivisuumik soqutigisarisimavaa. Nuunnissaminut eqqarsaateqanngikkallaramili atuagarpassuit atuarsimavai. Atuagaarniarfimmi sulisup ullut ilaanni aperisimavaa sooq Kalaallit Nunaanukarniannginnersoq.

Aamma atuaruk VIDEO Juullip nipitittagaa ullumi saqqummissaaq

Siullermik eqqarsarsimagaluarpoq angalaniarneq ajornakusoorlunilu akisuvallaassasoq, namminerlu misigisassarsiortorsuunani. Nunatsinnulli soqutiginninnera naggataatigut ajugaavoq.

Siullermik Ilulissap kujataani Iliminami ilaqutariit tikeraartarsimavaai. Isertormullu nuunissani 2012-mi aalajangiussimavaa.

- Taamaammat Kalaallit Nunaannut nuunnissara aalajangiuppara, Tunu najugaqarfigissallugu toqqarpara, isumanni manna kusanarnerpaammat, Isertormi ilinniartitsisoq franskermiu Anna Mornet.