Kalaallit savalimmiormiullu Folketingimi ilaasortaatitaasa, Danmarkimi naalakkersuisunut illuatungiliuttut suleqatigalugit, USA-mi isertortumik paasiniaasartoqatigiit, CIA-kkut, Danmark Kalaallit Nunaallu qulaallugu isertortumik timmisartuussisarsimanersut misissuinissaq piumasarinialerpaat.
Folketingimi ilaasortat ataatsimiitamik misissuisussanik pilersitsisoqarnissaa kissaatigaat, amerikamiullu isertortumik paasiniaasartoqatigiivisa, CIA-kkut, Danmarkip silaannartaani isertortumik timmisartuussisarsimagaanerat, ataatsimiititaliap pilersinneqartussap sukumiisumik misissussavaa. Misissuinermi Kalaallit Nunaat Savalimmiullu qulaallugit timmisartuussisoqartarsimanersoq misissorneqassaaq.
Danskit naalakkersuisuisa Dansk Folkepartiillu USA-mut attaveqartarneq pingaarnerutillugu misissuisoqarnissaa kissaatiginngilaat.
Europami siunnersuisooqatigiit, EU-mi ilaasortat avaqqullugit, CIA-kkut isertortumik timmisartuussisarsoralugit, kiisalu CIA-kkut nunani pineqartuni isertortumik parnaarussiveqarsoralugit, misissuinissaannik kajumissaarutaat, Kuupik Kleistip, Lars-Emil Johansenip Danmarkimilu naalakkersuisunut illuatungiliuttut innersuussutigaat.
Kalaallit Nunaat qulaallugu timmisartuussisarsimagaanerit danskit ministeriunerata, Anders Fogh Rasmussenip, sapaatip-akunnerani kingullermi ilumuunnginnerarpai, suliarlu angallannermut ministerimut, Flemming Hansenimut, kingusinnerusukkut ingerlateqqippaa.