Isertortumik timmisartuussinerit paasissutissanikkiartorput

Timmisartuussisarnerit ilimagisamit amerlaneruneri danskit nutaarsiassaqartitsiviinit ullumi saqqummiunneqarpoq. Amnesty Internationalip New York Timesillu paasissutissiineranni tamanna atuarneqarsinnaavoq.

- Danskit naalakkersuisui tunniutiinnartariaqarput naqqalu tikillugu misissuisitsillutik, folketingimi ilaasortaq Kuupik Kleist oqarpoq – CIA-p isertortumik timmisartuussisarnerinik misissuisoqarnissaanik taanna siuttuuvoq:

- Naalakkersuisut misissuinissamik piumasaqaatitsinnut naameertuassappata eqqumiiginartorujussuussaaq, Kuupik Kleist oqarpoq.

Taanna erseqqissaavoq nammineq kisimik pinnatik nunalli tamalaat akornanni piumasaqaatit sakkortusiartuinnarnerat taakkartorpaa.

- Europa parlamentiminngaanniit aamma piumasaqarneq sakkortusiartorpoq, taamaattumik paasissutissat nutaat saqqumiortoraluttuinnarneranni piumasaqaammut naaggaartuinnassagaanni taava aamma pasillerneqarneq annertusiartuinnassooq, Kuupik Kleist oqarpoq.

Taanna qalleqqissaalluni isumaqarnerarpoq piumasaqaammut angertoqartariaqassasoq

- Paasissutissat nutaat saqqummiunneqartuartillugit danskit naalakkersuisuisa misissuerusunnginnerat eqqumiigissaqaara.