Isertortumik paasiniaasartut nalunaarusiaat atuarusuppaa
Politiit isertortumik paasiniaasartuisa nalunaarusiaat Hans Jakob Helmsip nammineq atuakkiamini "Arsarnernut uinngiarsukkuit"-mi tigulaariffigaa.
Inuit Issittormiut Siunnersuisoqatigiiffianni ICC-imi suleqataasutut nutaatut, atianik nalunaarsorneqanngitsutut PET-mit eqqartorneqarpoq, taannalu partiimi Socialdemokratini ingasaassiniartuunngitsutut allaserineqarpoq, aammalu piffissap ilaani - ingasaassiniartutut - allaat stalinistitut PET-mit allaaserineqarluni.
Hans Jakob Helms ICC-mi suliffeqarnikuuvoq, allaaserisamilu nammineq pineqarnerluni paasiniarpaa.
Isertortumik paasiniaasartut nalunaarusiaanni imminut tunngasorisamini politikkikkut partiimut sorlermut ilaasortaanerminik pasillerneq ilumuunngilluinnartuusoq Hans Jakob Helmsip taakkartorpaa.
- Uanga pineqarnerlunga paasisaqariaqarpara, aamma paaserusuppara atera uangalu pillunga paasissutissat kiap PET-mut tunniussimanerai, Hans Jakob Helm oqarpoq.
Qallunaat politiivisa isertortumik paasiniaasartuisa Kalaallit Nunaanni Savalimmiunilu suliaat nalunaarusiami 2009-mi allaaserineqarput. Taamatuttaaq Hans Jakob Helmsip atukkiamini saqqummmersinneqaqqammersumi pisuusaartitsinerit piviusullu imminnut qanittuararsuusut oqaatigaa.