Isertortumik isumaqatigiittarsimasutut pasisaasut

Unnerluunneqartut tassaapput Permagreen Grønland, B.J. Enterprise kiisalu Kang-Total-Byg.

Taakku ilaatigut Kangerlussuup ilaasunut aqqusaartarfianik sanaartornissamut Sisimiunilu Aatsitassalerinermik ilinniarfissammik sanaartornissamut atatillugu akunnerminni isumaqatigiissusiorsimasutut unnerluunneqarput.

Sisimiuni Aatsitassalerinermik ilinniarfiup sanaartorneqarnerani pisut ippassaq sammineqarmata, Permagreenip pisortaa Preben Kold Larsen siulliulluni killisiorneqarpoq.

Taassuma nassuiaanera malillugu, Aatsitassalerinermik ilinniarfissaq Sisimiuniittoq sanaartortussarsiuunneqarnialermat, B.J. Enterprisermiu Permagreenimut attaveqarsimavoq. Preben Kold Larsenilu naapertorlugu Permagreen akikinnerusumik neqerooruteqaqqullugu B.J. Enterprisemiit uteriiserluni piumaffigineqarnerarluni.

Permagreenermiulli taamani suliassaaleqinngimmata aammalu suliassamut tunngatillugu neqeroorusiornissamik pilersaaruteqanngimmata, Preben Kold Larsen akit pillugit isumaqatigiissuteqarnissamut naggataatigut akuersaaginnarsimanini nassuerutigaa.

B.J. Enterprisemili pisortap John Kvistgaard Eliassenip taamani pisut eqqaamasinnaannginerarpai, taamanigooq sulinngiffeqarluni aallaqqagami suliffeqarfimmik piginneqataata suliaq ingerlassimagaa oqaatigalugu.

John Kvistgaardili sanaartugassanut tunngasuni inatsisit unioqqutillugit isumaqatigiissutigeriikkanik neqerooruteqartarnerni arlaatigut akuusarsimanini ima nassuerutigaa.

- Taamaasiorama inatsisinik unioqqutitsisorisimanngikkaluarpunga, kisiannili arlaatigut eqqunngitsuliorlunga taamani takusinnaagaluarpara. John Kvistgaardip inatsisinik unioqqutitsilluni isumaqatigiissutigeriikkamik suliarinnittussarsiuussinerni sooq neqerooruteqartarsimanera eqqartuussisup apeqqutigimmagu taama akivoq.

Sanaartortitsisartunut pingasunut eqqartuussivimmi suliarinninermi unnerluussissutit amerlangaarmata, suliap sapaatip akunnerata tulliani aatsaat naammassineqarnissaa naatsorsuutigineqarpoq.

Politiit peqquserluuteqarsimasunik paasiniaasartui Unammilleqatigiinnissamullu nakkutilliisut 2009-mi sanaartortitsisartut taakku pingasut isaaffigaat, taakkulu pappialaataat qarasaasiamilu uninngasuutaat arsaarinnissutigalugit.

Eqqartuussinermut atatillugu taamani oqarasuaatikkut oqaloqatigiinnernit immiussat ullumi tusarnaarneqarsinnaajumaarput.