Isertortumik aallaaniartartut nunatsinneersuuneragaasut Canadamiut politiivinit tigusariniarneqarput, tamannalu pissutigalugu Canadamiut politiivi Canadap issittortaanukartinneqarsimapput tassani alapernaarsuiartortinneqarlutik.
Nunatsiaq News taama allappoq.
Politiit Ellesmere-p qeqertaanut, imaluunniit Umimmaat Nunaannukartinneqarsimapput, nannunik piniaqqusaanngitsunik piniartoqarnissaa pinngitsoortinniarneqarami. Piniartut nunatsinneersut tassani nannunniartarsimaneragaapput.
Sakkutuut marluk nunamillu ilisimannittut tallimat politiit saniatigut peqataatinneqarput.
Piniartut nunatsinneersut akiliisussanngortinneqarsinnaapput tigusarineqassagaluarunik.
Kalaallit Umimmaat Nunaanni ukiuni tuusintilippassuarni piniariartarsimapput, Nunatsiaq News allappoq, taamaammallu nunamik taassuminnga piginnittussaanertik takutereersimallugu. Canadamiut maannamut ukiuni 50-ini Umimmaat Nunaanniissimapput.
Canadamiut politiivisa tamanna pillugu apeqquteqarfigineqarmata Canadap nunanut allanut ministereqarfianut innersuussiinnarsimapput, tassanngaanniit akissutisisoqarsinnaanerarlugu.
Nunamik piginnittussaanertik takutinniarlugu Canadamiut sakkutuunik Canadap avannaarsuanukartitsipput.
