Isertitsivinni nakkutilliisussat soraarummeerput

Pineqaatissinneqarsimasunut isertitsisarfinni nakkutilliisutut ilinniartut 20-it sinerissami isertitsivinni assigiinngitsuni ilinniartuusut ullumi soraarummeerput.

Soraarummeerneq ulluni pingasuni sivisussuseqarpoq. Isertitsivimmi pissutsit piviusut aallaavigalugit piviusuusaartitsinerminnit soraarummeertut nalunaarusiortinneqarput ullumi illersukkaminnik. Soraarummeernermik aqutsisoq nunatsinni isertitsivinni sulisunut siunnersorti Per Skelvig ima oqarpoq:

- Isertitsivimmiittussanngorlugu pineqaatissinneqarsimasuusaartitarput isertitsivinni pissutsinik assut misilittagaqarluartuuvoq, mattussallu pissuserisartagaat issuarluinnarlugit pissusilersorsinnaalluni. Mattussat ilaatigut nuannersumik aammali nuannerpallaanngitsumik pissusilersortarput, ilaatigullu nukiit atorlugit eqqissisaasoqartariaqartarpoq. Nakkutilliisut sulinerminni imaannaanngitsunik ilaatigut misigisaqartarput, pissutsillu tamakku tamarmik soraarummeernermi ilaatinneqarput, Per Skelvig nassuiaavoq.

Nunatsinni pineqaatissinneqarsimasunut isertitsivinni nakkutilliisutut ilinniartitaaneq nunarsuarmi ilinniakkanut assingusunut sanilliukkaanni pitsaanerpaanut ilaasoq Per Skelvig oqarpoq.

- Nunani allani parnaarussat uagutsinnit atugarlunnerusarput; parnaarussiverujussuarniittarput saviminernik ungalulikkanik ineqartinneqartarlutik sukannersorujussuarmillu allaat aallaasilinnik paaqqutarineqartarlutik. Maani pinerluttaalisitsinermut inatsit tunngavigalugu nakkutilliisut ilinniartitaapput mattussat inuiaqatigiinnut uteqqinnissaannut suleqataasarlutik, Per Skelvig oqarpoq.

Nunatsinni isertitsivinni nakkutilliisunngorniarlutik ilinniartut soraarummeernerannit immiussat ataasinngorpat Iterluarnaami tamakkerlugit tusarnaarsinnaajumaarpasi.