Isertitsivinni nakkutilliisunngorniarneq ingerlalluarpoq

Isertitsivinni nakkutilliisutut ilinniarneq 2001-imi aallartittoq ingerlalluarpoq. Nakkutilliisut maannamut 60-t missaanniittut naammassereersimalerput, naammaqqajanngillalli. Isertitsiviit sinerissamiittut tallimaasut amerlanerusunik atorfissaqartitsipput:

-Ila ilinniartitsineq ingerlalluaqaaq. Maannakkorpiaq 20-nik ilinniartuuteqarpugut taakkulu ingerlalluarput.

Ukioq 2001-imi isertitsivinni nakkutilliisutut ilinniartitsineq atuutilersikkatsiguli maannamut 60-it missaanniittut naammassisimapput taakkulu tamarmik sinerissami isertitsiveqarfitsinni sulipput, Isertitsivinnik Isumaginninnermi Sulisoqarnermut siunnersorti Per Skalvig oqarpoq. Skalvig misigisimavoq isertitsivinni nakkutilliisutut ilinniarfeqalersimaneq iluatsilluartoq.

Isertitsivinni nakkutilliisutut atorfiit qulit missaanniittut - assersuutigalugu Nuummi arfineq-marluk Aasiannilu marluk – ullumikkorpiaq inuttaqanngillat, taamaattumik ilinniartuutaasut 20-t naammassillutik sulileraluarpataluunniit ilinniartitsineq pisariaqartuassasoq Per Skalvig oqarpoq.

-Sulisut sulinermik allamik misileerusullutik soraartarput, taamaattumik ilinniartitsiuassaagut. Ukiormanna, aappaagu ukiunilu tulliuttuni.

Aperigatsinni sulisut pigiinnarniarlugit qanoq iliortarnersut, oqarpoq suleqatigiilluarneq pingaartittaritsik, taamaammallu isertitsivinni nakkutilliisutut ilinnialersartut 15-20 procentiinnai taamaatiinnartartut unnerpai.

-Angusarisartakkavut ajorisassaanngeqaat, 0 procentinngortissinnaagunanngilarpummi, Isertitsivinnik isumaginninnermi Sulisoqarnermut siunnersorti Per Skalvig naggasiivoq.

Isertitsivinni nakkutilliisutut ilinniarneq ukiunik marlunnik sivisussuseqartarpoq, atuagarsornertaalu sapaatip-akunnerinik qulingiluanik sivisussuseqartarluni. Ilinniarnerup nalaani Danmarkimi parnaarussivik Herstedvester qaammatini pingasungajanni misilillugu suliffigineqartarpoq, sulillunilu misiliinerup sinnera nunatsinni isertitsivinni ingerlanneqartarluni.