Isertitsivimmiittut allaffiup matua aseroriarlugu qimaasimapput
Sapaataalluni isertitsivimmi susoqarpianngimmat isertitsivimiittut qimaaniarnissaminnut piffissaqarluarsimaqaat. Isertitsivimmiittut amerlaqisut ineeqqaminniinngillat, isertitsivimmi ammasuummat. Qimaaniartullu isumaqatigiissimasinnaapput, paarsisoqarsimasinnaallutillu, sulisut qimagukkaangata qimaaniarnertik nangiinnartarsimasinnaavaat, tamaasali suli apersorsinnaasimanngilavut, sulimi marluk nassaarinnginnatsigik. Nipiliorsimanngeqimmatalu sulisut sianigisaqarsimanngillat.
Isertitsivimmiit qimaasut pillaatissinneqarsimanermik saniatigut pillarneqassapput, qimaasimasuinnaanngitsut Kalaallilli Nunaanni isertitsivimmiittut tamarmik takusinnaassammassuk iliuutsitik qanoq kinguneqarsinnaasut.
Immaqa allanut paasiuminaassinaagaluartoq; isertitsivimmiittut soorlu illoqarfimmi aneertillutik qimaagaluarunik aneersinneqaqqinnavianngillat, ilaat allaat ineeqqami kisimiisillugit paarnaarukkallarneqarsinnaapput, Nuummi Pineqaatissinneqarsimasunut isertitsivimmi pisortaq, Peter Jyndevad oqarpoq.