Nunatsinni pineqaatissiisoqartillugu isertitsiviit amigarmata, Sisimiuniittussamik isertitsivimmik inunnut 20-nut inissalimmik sanasoqalerpoq.
- Illu attartugarput nutarterlugu isertitsiviliarineqassaaq. Juunip aallaqqaataani attartorlugu aallartissavarput, tamatumalu kingorna suliarereerutsigu ilimanarpoq juunip ingerlanerani isertitsivittut atorneqarsinnaalissasoq, taama oqarpoq nuna tamakkerlugu isertitsivinnut pisortaq Mikael Stage.
Isertitsiviliassaq inunnut 20-nut inissaqartitsissaaq. Maannakkuugallartorlu isertitsiviit, tassalu Nuummiittoq, Aasianniittoq, Qaqortumiittoq Ilulissaniittorlu katillugit inunnut 103-nut inissaqartitsipput, maannalu tassa inissat 20-nik ilaneqartussanngorput. Isertitsivimmut inissinneqartussanik utaqqisoqartillugu nalinginnaasumik qaammatit 18-t utaqqisoqarajuttarpoq.
Ippassaq radioavisimi oqaatigisatsituut, pineqaatissinneqarnissartik pillugu isertitsivimmiittussatut utaqqisinneqartut nuna tamakkerlugu katillugit inuit 176-iupput.
Mikael Stage-lu aperaarput isertitsiviliornissaq utaqqisorpassuit eqqarsaatigalugit qanoq iluaqutigineqarsinnaanersoq.
- Isertitsiviliornissatsinnut soorunami tunngavigaarput ukiuni kingullerni isertitsivinniitinneqartussat amerliartupiloornerat ukiummi sisamat ingerlanerini utaqqisut 40 procentimik qaffariarput. Soorunami assut neriuutigigaluarparput taama utaqqisoqartaleraluttuinnarnera unikaallakkiartorumaartoq, Mikael Stage oqarpoq.
Taanna erseqqissaavoq, naak inunnut 20-inut isertitsiviit inissaqarnerulissagaluartut utaqqisut amerlassusaat imatut appariangaarnavianngitsut, misilittakkammigooq naapertorlugit pissusiviusut taamaakkajunngimmata.
Eqqartuussiveqarneq pillugu ataatsimiititaliarsuup isumaliutissiissutaa naapertorlugu Nuummi matoqqasumik parnaarussiviliortoqarnissaa inassutigineqarpoq.
Ulluni makkunani matoqqasumik parnaarussisoqassatillugu Danmarkimut Herstedvesteriliaanneqartarput.