Isertitsiviit misissorneqarput

Nunatsinni isertitsiveqarnerup pitsaassusaa qanoq ippa? Ulluni makkunanerpiaq Folketingip ombudsmandeqarfianeersunik illoqarfiit nunatta qeqqaniit kujammut misissuivigineqarput.

Misissuisut pisortaat Lennart Fransen ima oqaluttuarpoq.

- Takuniaasarnitsinnut siunertaasarpoq inunnut minnerusumik annerusumilluunniit piumassuserinngisaminnik inissiisarfinnut inissinneqartariaqarsimasut akornanni naammagittaalliorfiunerpaasimasut takuniassallugit. Tassalu imaappoq inuit inuiaqatigiit akornanni sanngiinnerpaatut taaneqarsinnaasut tassani pineqarput immaqalu taakku pineqaatissinneqarnertik pillugu iliuuseqangaarsinnaanngitsuupput.

- Pisariaqalersimavorlu isertitsiveqarnermut attuumassuteqanngitsunik inunnik takuniaasoqarnissaa. Folketingip ombudsmandeqarfianiit pisussaaffigaarput isertitsiviit, parnaarussiviit kiisalu aalakoortunut isertitsiviit nakkutigisarissallutigik, Kalaallit Nunaannuttaaq taamatorluinnaq aamma pisussaaffeqarpugut, taama oqarpoq Lennart Frandsen.

Taassuma suleqatini marluk peqatigalugit sapaatiummalli Nuummiit Qaqortoq tikillugu isertitsiveqarneq misissuiffigaat, taamatuttaaq aalakoortunut isertitsiviit taakkunannga misissorneqarput.

Ullumikkut angalaqatigiit Nanortalimmut killipput.

- Siullertut maluginiagassaraagut inunnut timikkut atugassarititaasut. Isumannaallisaaneq aamma maluginiarparput, inip iluani inummut imminut innarlerniartumut innarliissutaasinnaasut soorlu imminoriaraluassutaasinnaasut imminussutaasinnaasulluunniit tassami taamatut pisoqarajuttarmat tamanna aamma misissorparput. Minnerunngitsumik aamma nakkutilliissutit soorlu filmiliuutit ajunnginnersut misissorpavut, Lennert Frandsen nassuiaavoq. Taanna nangilluni oqaluttuarpoq, inissiisoqarsimaneranut nalunaarsueriaaseq aamma misissussamaaritsik, tassungalu atatillugu pingaarnerutillugu aalakoortunut inissiisimanerit misissorumasimagitsik. Taamaalillutik malittarisassat maleqqissaarlugit inissiisoqartarsimanersoq misissorneqarsinnaaniassammat. Soorlu ataatsimiissutigalugu nalilersorneqaataassanersut imaluunniit nakorsamit missugaasussaanersut.

Misissuilluni angalaneq arfininngorpat naammassissaaq, Narsamilu aalakoortunut isertitsivik aamma takuniarneqartussaavoq.