Isertitsiviit kanngunaannartut

Sinerissami politeeqarfinni isertitsiviit isertitsivigissallugit tulluannginneri pillugit folketingimi eqqartuussiveqarnermut ataatsimiititaliap Folketingip ombudsmandia ippassaq ataatsimeeqatigaa, iliuuseqartoqarnianngikkallarporli.

Folketingip ombudmandia sinerissami isertitsiviit pillugit nalunaarusiaa tunngavigalugu eqqartuussiveqarnermut ataatsimiititaliap siulittaasuata Anne Baadstrupip oqaatigaa isertitsiviit mikivallaartut, mikivallaarnerilu pissutigalugit paarnaarussanut sulisunullu ajornartorsiortitsisut maanna iliuuseqarfigineqassanngitsut.

Folketingip ombudmandiata sinerissami isertitsiviit iserfigalugit misissuinermini maluginiagaani ajornartorsiutaasut arlaqarput.

Isertitsivinni sivikinnerusumik sivisunerusumillu tigummineqartartut ataatsimoortillugit isertisivimmiitinneqarajuttarsimapput. Tigummineqarallarsimasoq ataaseq sivisunerpaamik ullut 67-it tigummineqarallarsimasoq folketingip ombudsmandiata nalunaarusiaraa. 

Isertitsiviit angissutsimikkut mikivallaarput. Isertitsivinni init pingasuunngikkunik sisamaasarput, paarleqartarlutillu. Aaalakoortut unnuisiinnagassat isertitsivinni amerlanerni paarlernut inissinneqartarsimapput.

Pinerluuteqarnermi inatsimmik unioqqutitsillutik pineqaatissinneqarsimasunut, tigummigallagassanngortitanulluunniit isertitsiviit ineraat amerlanertigut atorneqartarsimapput, ineeqqamiitsitaasarpullu amerlanertigut madrasse nallavigalugu. Pineqaatissinneqarsimasut tigummigallagassanngortitalluunniit ataatsimut isigalugu qaammatini pingasuni parnaarussaanerminni ineeraat pequtsersorneqarsimaneq-ajorput.

Ineeqqat TV-kut upalungaarneqarsimasarput, Pineqaatissinneqarsimasut tigummigallagassanngortitalluunniit ineraasa matuisa igalaavatigut alakkarneqarsinnaajuarsimapput. Sivisunerusumik isertitsivinniitinneqartartut allatigut periarfissinneqartarsimanngillat, soorlu timimik aalatinnissaanut. Pineqaatissinneqartartut isertitsiviinut Qaqortumiittumi, Nuummi, Aasianni, Ilulissanilu inissitassat aamma ajornartorsiutaasut Folketingip ombudmandiata nalunaarusiaani taaneqarsimavoq.     

Sinerissami isertitsiviit iliuuseqarfiginissaannik eqqartuussiveqarnermut ataatsimiititaliaq maanna tusarniaavoq, tusarniakkallu suli tutsaqarsimanngillat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat