Isertarfik pilersinneqalerpoq
Kommunerujussuit sisamaannanngortinneqarpata innuttaasut namminneerlutik pisariaqartitaminnik aallerfigisinnaasaat qarasaasiakkut isertarfissaq pilersinniarlugu Namminersornerullutik Oqartussat misissueqqissaalerput. Misissueqqissaarnermi atugassanik Danmarkimi suliffeqarfik DevoTeam skemaliortinneqarsimavoq apeqqutinik akisassanik imalinnik.
Skemat kommunini suliassaqarfinnut assigiinngitsunut agguataagaapput, kommuninullu aasap ingerlanerani akisassanngorlugit nassiunneqarput. Suliassat suut sulisut ataasiakkaat piffissartorfiginerusarneraat paasiniarneqarpoq. Qarasaasiakkut isertarfik qanoq aaqqissuunneqarsinnaanersoq paasiniarneqarpoq, taamaalilluni suliassat naammassineqartarnerat kiffartuussinermi sulisunut ulluinnarni innuttaasunut attaveqartunut nuunneqarsinnaaniassammat.
Innuttaasut isertarfeqalernikkut namminneq kiffartuussinermi pisariaqartitaminnik aallersinnaalissapput aammali kommunini saaffiginnittarfinni nunaqarfiillu allaffiini sulisut periarfissaqalissapput ullumikkornit amerlanerusutigut kiffartuussinissaminnut.
Faxi atornagu imaluunniit kommunip allaffianut sianinngikkaluarluni internetikkut toqqaannartumik ikiortissarsisoqarsinnaalissaaq, soorlu qinnuteqaatinik immersuiniarnermi. Apeqqutit akissutissartaat septemberip aallartinnerani nalilersorneqassapput, isertarfiullu qanoq ittuunissaanik piumasanik erseqqissaatit suliarineqassapput.
