Isertarfiit innarluutilinnut, pitsorluttunut kørestolilinnullu naleqqutinngilluinnarput

- Kalaallit Nunaanni aporfiunerpaasarpoq soorlu makku isertarfiit tamanit atorneqakkajunnerusartut iserfigisinnaannginnakkit – allaffissuit allallu isertarfeqarniarnerat assorsuaq ilaatigut kipiluttunartarpoq, angut inuusuttoq oqarpoq.

Kisianni neriuutigiuaannarpaa ullut tamaasa tamakku pitsanngoriartinneqarnissaannut suliniartoqassaaq.

- Aamma tamanna upperiuaannarpara.

Ole Thomsenip oqaasii Innarluutillit Kattuffiata ilumoornerarpai, taamaattumik Kattuffik Ineqarnermut Naalakkersuisumut saaffiginnissamaalerpoq. Pisortat ingerlataanni pissutsit iluarsiivigisariaqartut Mette Sofie Lerch oqarpoq.

-Ukiormanna inatsit atulersoq isaarissamut tunngasoq suliarineqalermat peqataanikuuvugut isumasiorneqarnikuullutalu. Taamaattorli inatsit taanna atulereeraluartoq pisortaqarfinni assigiinngitsuni iluarsartuussinernik malitseqannginnera uagut kattuffimminngaanniit eqqumafigivarput aammalu ineqarnermut naalakkersuisoq attaveqarfigisussaallutigu.

Mette Sofie Lerch oqarpoq, naalakkersuisumut qanittukkut saaffiginnikkumaarlutik. Sinerissami innarluutillit Peqatigiiffiisa ilaannit maluginiarneqarpoq, pingaartumik pisiniarfinni oqaluffinnilu isaarissat kørestolilinnut naleqqussarneqartalersut.

- 2006-imi inatsit atulersoq immikkoortortaqarfitta pinikuuaat, aammalu sakkussatut innersuussutiginikuuarput. Malunnarporlu aamma immikkoortortat ataasiakkaat nalunaaruteqartarnerisigut pitsanngoriartortut, pingaartumik pisiniarfiit eqqarsaatigalugit. Aammalu oqaluffiit isaariaat aamma ataasiakkaatigut atortulersorneqartarsimallutik. Tamakku Kalaallit Nunaanni arriikkaluartumik aaqqikkiartorneqarput eqqumaffigineqariartorlutillu.

Innarluutillit Kattuffianni siulittaasoq Mette Sofie Lerch oqarpoq.