Isarukitsorpassuit toqusimasut siumorneqarput
Isarukitsut taama amerlatigisut sooq toqusimanersut ilisimaneqanngilaq. Timmissat taakku qernertut/-qaqortut toqungasut Brasiliami ukiumut qulit missaannaat nassaarineqartaraluarput. Isarukitsunik toqungasunik taama amerlatigisunik nassaarneq paasisimasaqarluartunit ernummatigineqartoq, nutaarsiassaqartitsivimmi AP-mi ilisimatitsissutigineqarpoq.
Isarukitsut toqusimasut amerlanersaat Argentinameersuunngikkunik Chilileersuupput, Falklandilluunniit qeqertaanneersuullutik. Avannamukaartillutik immat kissarnerusut nerisassarsiorfigisarpaat, isarukitsulli aqajarui misissorneqarmata paasineqarpoq iisaqarsimanngivissut.
Brasiliami biologit ilaat isumaqarpoq, isarukitsut perlerlutik toqusimassasut.
Ilisimatuut maanna misissorpaat immat nillertinnerusimanerisa isarukitsut nerisassaaleqitissimaneraat - imaluunniit isarukitsut perlernerannut inuit pisuusimanersut.
- Imaassinnaavoq aalisakkanik amikunillu aalisapiluttoqarsimasoq, isarukitsummi tamakkutuumasuupput, Peruibe Thiago do Nascimentomi akvariaqarfimmi biologi aviisip Politikenip nittartagaani taama issuarneqarpoq.