Isaksen Designikkut tunisaat amerleriarput
-Nunat eqqarsaatigalugit, tunisagut, pisisut pingasoriaammik amerlipput. Norgeminngaaniit pisisoqaqqippoq, taavalu aamma Danmarkimi Sverigemilu amerlillutik. Kalaallit Nunaanni marluunik aamma immikkoortortaqarfiuteqarpugut, Ilulissani Nuummilu, nunat allat atassuteqarfigissalluta aamma neriorsorpaatigut, neriuppugut iluatsissallutigik, Rita Isaksen oqarpoq.
Isaksen Design New Yorkimut septembarip 14-iani aallassapput, 22-anilu utissallutik.- Atisaatitsinnik New Yorkimi pisisut ullorsiorniaramik, Dansk Designerimik taallugu, atisanillu pisiffigisimasamik atisaliaannik ulloq taanna takutitsiniarput, pisiniarfissuarlu takutitsiffissaq tassunga atatillugu ulloq naallugu matoqqassaaq, Rita Isaksen oqarpoq. Inuppassuit isiginnaarutaannakkut takusartakkamik naapinnissaat pissangageqaa. Namminneq atisaliatik allaanerujussuunerarpai, allanut naleqqiunneqarsinnaanngitsut. Pannilu Nickie atisalioraangamik, atisaliassatik titartarlugit pappialamut nuutsikkaangamikkik, kingornalu atisaliaralugit, eqqarsaatitik assigiikkajunnerarpaat, tassami Kalaallit Nunaat eqqarsaatiginerusaramikku. Annoraamerngit eqqarsaatigiinnarlugilluunniit Rita Isaksen assersuusiorpoq, taakkugooq saattuussanngillat, annoraaminiussallutilli ninngusuut, oqortut.
New Yorkimi pisiniarferujussuup Takashimayakkut Danmarkimi tunisassiat saqqummersippatigik, Isaksen Designikkut ilaaffigisaanni, kunngissaq Frederik aamma nulia Mary qaaqqusanut ilaapput.
