Isaksen Design USA-mi alutorineqarput
Atisanik ilusilersuisartut nunatsinneersut Isaksen Designikkut suliaat New Yorkimi pisiniarfissuarmi Takashimayap atisaarniarfiisa ilaanni tunisaanerpaapput.
Ilusilersuisartut Danmarkimeersut 22-t nittarsaassinermut atatillugu USA-miipput, Isaksen Designilu taakkununnga ilaavoq.
Kunngissaq Frederik nulialu Mary nittarsaassinermi siuttuupput, pisiniartullu Isaksen Designip suliaannik nuannaarisaqarluartut, Takashimayap tunisassanik pisiortortartua Andrew Mandell oqarpoq.
- Atisat tuniniakkavut Kalaallit Nunaanneersuusut oqaatigisinnaallugit pikkunartaqaaq. Allamiorpalaaqaat. Mandell oqarpoq.
Sermitsiami tamanna atuarneqarsinnaavoq.
Isaksen Designip suliai Københavnimi februaarip qaammataani atisaliortut saqqummersitsineranni Andrew Mandellimit maluginiarneqarput, pisiarineqarlutillu.