Isak Hammond: Inuusuttut ajornartorsiortut ikiorneqarlik

Qaasuitsup Kommuniani kommunalbestyrelsemut ilaasortap Inatsisartunilu ilaasortap Isak Hammondip, Qeqertarsuup tunuani inuusuttut sakkortuumik misigaqarnermi kingorna tarniluuteqartut amerlassusii paasillugit tupappoq.

Taakkualu ikiorserneqarnissaannut nukissat pigineqarnersut maanna ujartorpai.   

-Tusarlugit tupannarpoq 30 procentit inuusuttut taama atugaqarnerat, Isak Hammond oqarpoq inuusuttut ikiorserneqarnissaannut iliuusissanik pilersaarusiortoqartariaqartoq piumasaralugu.

-Tupannarpoq tusarlugu 30 procentit inuusuttut taamatut atugaqarnerat, aammalu eqqarsariaallannarpoq ukiorpassuarni Nunatsinni psykologinik pisariaqartitsinerput qanoq maannakkut uppernarsaqqinneqaqqinnera tamatuma tungaanut, Isak Hammond, Inatsisartuni Ilaqutariinnermut Peqqissutsimullu Ataatsimiititaliami ilaasortaasoq, Qaasuitsup Kommunianilu kommunalbestyrelsemut ilaasortaq, Qeqertarsuup tunuani inuusuttut 269t misissuivigineqareernerisa kingorna paasisanut qisuariaateqarnermini taama oqarpoq.

Inuusuttut qanigisaminni sakkortuunik misigisartarnermi kingorna tarniluuteqartartut, soorlu ilaquttaminnik toqusoornikkut, pinngitsaalisaanikkut, kinguaassiutitigut atornerlunneqarnikkut timikkulluunniit annersarneqartarnermi kingorna tarniluuteqartartut, Syddansk Universitetemi psykologip Sidsel Karsbjergip misissuinerata kingorna paasinarsivoq.  

Qaasuitsup Kommunia piaarnerpaamik iliuusissatut pilersaarusiortariaqartoq, Isak Hammond maanna piumasaqarpoq. Aamma Kommune, KANUKOKA Namminersorlutillu Oqartussat suleqatigiittariaqartut erseqqissaatigalugu.

-Taavalu pikkorissaanerit oqaloqatiginninnernik, ikiorsiinernik aammalu tarnikkut annikilliortunut tapersersuinernut iliuusissat assigiinngitsut pilersaarusiorneqarlutik , Qaasuitsup Kommunia matumani siuttuusariaqarpoq, Isak Hammond oqarpoq nassuiaallunilu ulluinnarni suliassatigut Qaasuitsup Kommuniani iliuuserineqarsinnaasut naammaginartut, kisianni inuusuttut akornanni ajornartorsiutit taama qaffasitsigitillugit immikkut ikiorserneqartariaqartut.

-Ikiorserneqanngikkunillu ukiut ingerlaneranni inersimasunngornerminni ajornartorsiutinik allanik nassataqartussaapput, taamaammat piaarnerpaamik iliuusissat pillugit pilersaarusiortoqartariaqarpoq.   

Sidsel Karsbjergip misissuinermini paasisani pillugit Kalaallit Nunaanni sapaatip akunnerata tulliani saqqummiussissaaq.