Isak Davidsen: Ilaqutariit aningaasaatiminnik atuineri misissorlik

Nunatsinni meeqqanut kaattunut qanoq ikiuussinnaanermik misissuisussamik suleqatigiitsitaliornissamik Folketingip Nunatsinnut tunngasunut ataatsimiititaliaata siunnersuutaa Inatsisartut ilaqutariinnermut ataatsimiititaliaani siulittaasup, Siumumeersup Isak Davidsen-ip, ilassilluarpaa, isumaqarlunili, ajornartorsiut Nunatta nammineq aaqqittariaqaraa, ilaatigut ilaqutariit aningaasaqarnerat misissorlugu.
Allattoq Jens Thorin
februaarip 09-at 2009 14:24

- Uanga ataatsimiititaliap siulittaasuatut oqarusuppunga, taanna iluarilluinnarpara. Isumaqarpunga suleqatigiissitap misissortariaqaraa, angajoqqaat pissaqarniarnikkut qanoq inissisimanersut. Nunatsinni isertitakissuseq aamma atugaavoq. Suleqatigiiissitarlu sukumiillunnartumik misissuisariaqassaaq, angajoqqaanuku sukkut atugarliortut, taakkuami meeqqaminnut pissaqartitsiniartussaapput, Isak Davidsen oqarpoq.

Meeqqanik kaattunik naammattuisarsimaneq tunngavigalugu Kommune Kujallermi atuartut tamarmik atuarfimmi nerinissamik neqeroorfigineqartalissasut KNR-imi pingasunngormat oqaluttuaraarput. Taamalu aaqqiineq Isak Davidsen isumaqatigaa:

- Inuiaqatigiinni oqallittariaqarpugut angajoqqaat ilaasa qanoq inissisimanerat paqumiginagu, ataatsimiititaliami siulittaasoq oqarpoq. Taassumalu Tasiusami atuarfiup pisortaa, Karta Korneliussen, illersorpaa oqartoq, angajoqqaat ilaasa imigassaq salliutittarmassuk meeqqat ilaat kaattartut.

Kisianni Namminersornissamut akuerseriarluta Danmarkimiiit ikiorneqarnissamut aamma akuersigutta, taakkua qanoq imminnut ataqatigiippat?

- Ikiuinermut tunngasumik danskit naalagaaffiat akulerutsittussaanngilarput. Angajoqqaat pissaqarniarnikkut inissisimanerat, suleqatigiissitap suliarisariaqarpaa. Pissaqaraluarlutik meeqqaminnik kaatsitsippat? Tamakkua misissorneqartariasqarput, Inatsisartut ilaqutariinnermut ataatsimiititaliaani siulittaasoq Isak Davidsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq