Isak Davidsen: Bingortarneq sukannernerusumik inatsisiliuunneqarli
Aningaasanoorluni binngortarnerup bingoarartarnerullu nunatsinni inatsisitigut sukannernerusumik aaqqiiffigineqarnissaanik, Inatsisartuni ilaasortap Siumumeersup Isak Davidsen-ip siunnersuutaa inatsisartut ullumi oqaluuseraat. Taama siunnersuuteqarnini Isak Davidsen-ip ima tunngaveqartippaa:
- Erseqqissassavara peqatigiiffiit bingornikkut peqatigiiffimminnik ingerlatsiniarnerat eqqorniarneqanngimmat, kisiannili ukiuni kingullerni nunarput tamakkerlugu bingorneq atugaaleraluttuinnarpoq. Soorlu Nanortalimmi pisut tusagassiuutitigut sammineqarnikuupput bingoararnermik taallugu inuit katerisimaartartut, qitornaat silataani utaqqisut. Tamanna nunatsini tamarmi takussaalerpoq. Taamaattumik siunnersuutinni taamatut aningasanoornernikkut atornerluineq qitiuvoq, Isak Davidsen oqarpoq. Oqarpoq angajoqqaarpassuit aningaasanoornermik ajornartorsiuteqarnertik pissutigalugu meeqqaminnik arsaagaasartut.
Isak Davidsen-ip siunnersuutaa inatsisartuni amerlanerussuteqartunit ilalerneqanngilaq, taamaattorli pisortat illuutaanni aningaasanoorneq inerteqqutaammat, bingortarnermut inatsisit nunatsinnilu pinerluuteqarsimanermut aalajangersakkat pillugit inatsisinik atortitsinermut ministeriaqarfimmut tusarniaasoqassasoq, tusarniaanermullu akissutigineqartut aallaavigalugit nunatsinni inatsisit sukaterneqarnissaat naliliiffigineqassasoq Tommy Marø oqarpoq. Aammali aningaasanoorluni bingortarnerup ilaqutariinnut sunniutai PAARISA suleqatigalugu misissorneqarniarput:
- Angajoqqaat aningaasanoortarnerat taavalu katersortarfiup avataani angerlarsimaffinni katerisimaartarfinnilu bingoarartarneq ullumikkut taama annertutigisimassappat, taava ajornartorsiut annertooq tikisimassavarput, tamannalu pillugu PAARISA peqatigalugu maannakkut suliniummik ingerlataqarniarpugut. Erseqqissaatigaa aningaasanoorajunnerup, imigassamik ikiaroornartumillu atornerluinerup kingunerisut meeqqanik sumiginnaanermik kinguneqarsimanissaa eqqoriaaginnarani erseqqissumik qulaajaaffigineqaqqaartariaqartoq.
Ilaqutariinnermut naalakkersuisoq Tommy Marø taama oqarpoq. Inissiaatileqatigiiffik INI A/S angerlarsimaffinni aningaasanoortarnermut eqqumaniaqqullugu saaffigineqassasoq Tommy Marø aamma oqarpoq. Isak Davidsen-ip siunnersuutaa ataatsimiititalianut ingerlateqqinneqarani ataatsimiinnerup matuma ingerlanerani aappassaaneerneqassaaq, Naalakkersuisut Siumut IA-llu kissaateqarnerat malillugu.
Aningaasanoorajunneq Qaqiffimmit nappaatitut akuerisaavoq, taamaattorli qasserpiaat taama nappaateqarnersut kisitsisaataatigineqanngilaq.
