Irlandimi aqagu taasissapput
Isumaqatigiissutip ilaatigut EU-mi taasineqaraangat, naalagaaffiit ilaasortaasut annerit salliutinneqartalernissaat, EU-llu nunat allat ilaasortaangitsut pillugit ministereqalernissaa anguneqassapput.
Taasinissarli qanilliartortillugu aningaasaqarniarneq sammineqarnerujartuinnarpoq.
Irlandimi illoqarfiit pingaarnersaanni, Dublinimi illugissaartut akornanni taasinissami naaggaaqqusisut angeqqusisullu allagartaliaat takuneqarsinnaagaluartut inuit qanoq taasissanerlutik aalajangereersimapput. Akileraaruserisoq, Casement angernissaminut arlalinnik peqqutissaqarnerarpoq; - Europamioqatigiit tapersersorpakka, EU-mullu ilaasortanngorattali nunarput ilorraap tungaanut aallarpoq, apeqqusigaqaraluarlunga angernissannut peqqutissaqarneruvunga, Casement oqarpoq. Akiatungaani illulik, Shemus Readan, aamma tapersiilluni oqarpoq, Irlandi EU-mulli ilaasortanngormat pissutsit ilorraap tungaanut ingerlalersimasut. Taamaalilluni paasinarpoq qinersisartut aningaasaqarniarnerup patajaatsuunissaa pingaartillugu taasissamaartut. Minnerunngitsumik inersimasut, Irlandimi suffissaaleqisoqarneranik piitsuunermillu eqqaamasallit eqqarsaatigalugit. Qinersinissaq sioqqutitsiarlugu naalakkersuisut siulittaasuat, Brian Cohen-ip oqalugiarnermini aamma aningaasaqarniarneq eqqartorpaa. Irland maannakut siuariartupiloorunnaarpoq, Europamiusullu allatut Irlandimiut siunissami aningaasaqarniarnikkut ajornartorsiulernissaq aarlerigaat. Naalakkersuisut allallu Lissabonimi isumaqatigiissusiamut angeqqusisut, aningaasaqarniarneq eqqartorpaat taamaalillutik qinersisussat anngaanissat kissaatigalugu. Isumasiueqqaarnerimmi takutippaat naaggaartut tapersersuisullu amerlaqatigiiginnangajattut.
Irlandimi aqagu qinersisoqarpat, ataatsimut inerneri tallimanngorpat nalunarunnaassapput.
Irlandimiut aqagu ullaakkut arfineq-pingasuniit unnukkut aqqarngup tungaanut qinersiartorsinnaapput, EU-milu ilaasortat pissanngateqaat, naaggaariataassangaluarpata EU-mi pissutsit qanoq ingerlaqqeriarnissaat pilersaarusiorneqarnikuunngimmat.
