Iranip præsidentia Københavnimut tikittussanngorpoq

Præsidenti Københavnimut tikeraarnissaminut atatillugu, piffissami sivitsortumi tusagassiorfinnik nunani killerneersunik oqaloqateqarusuttanngikkaluarluni, maanna Danmarkip Radiuanit apeqqarissaarfigineqarpoq, Kim Bildsøe Lassen apersuisoralugu.

Mahmoud Ahmadinejadip apersorneqarnermini Iranip atomip nukinganik nukissiorfiliorniarnera oqallisaaqisoq illersorpaa.

Taannami isumaqarpoq, atomip nukinganik nukissiuuteqarneq, nunarsuarmiut silap pissusaanut tunngatillugu ajornartorsiutigiligassaannut qaangiiniarnermi atorneqarluarsinnaasoq. Præsidenti taamaattumik isumaqarpoq, nunat tamat atomip nukinganik nukissiuuteqarnissamut periarfissinneqartariaqartut.

Nunarsuarmiut piffissami sivitsortumi Iran atomimik qaartartorsualiornerarlugu pasivaat, taamaattumik Kim Bildsøe Lassenip præsidenti toqqarlugu aperaa, Iran atomimik qaartartorsuaateqarnissaminik kissaateqarnersoq.

- Illit tamanna nammineerlutit ilimagiviuk? - Isumaqarpit atomimik qaartartorsualiaq pitsaasuusoq? Danmarkip taamaattumik peqarnissaa kissaatigaajuk, Mahmoud Ahmadinejad akivoq nangillunilu:

- Isumaqarpugut atomimik qaartartorsualiat ajortuusut. Atomimik qaartartorsualiat sumut atorneqartaramik? Inunnik toqoraanermut atorneqartarput, Mahmoud Ahmadinejad akivoq, taamalu Iranip atomimik qaartartorsuaateqarnissaminik kissaateqannginnera oqaatigalugu.

Iranip præsidentiata apersorneqarnera unnugu TV-aviisimi takuneqarsinnaavoq.