Iranip præsidentia uranimik nassiussisinnaanerarpoq
Præsidentip taama oqaaseqarnera ilumoorpat, tamanna atomi pillugu aaqqiagiinnginnermut pingaarutilimmik allannguineruvoq.
Amerikamiut europamiullu atorfilittaasa, atorfilittat Ruslandimeersut Kinameersullu, Iranimut niuernikkut sakkortuumik iliuuseqartinniarlugit maanna kajumissaaleruttorpaat.
Tamatumunnga pissutaavoq Iranip nunat tamalaat neqeroorutaat akueriumanngimmagu, tassa matumani neqeroorutigineqarmat, Iranip atomip nukinganik atuiniarnermini atomip nukinganik sakkussiornani taamaallaat nukissiuuteqarneq ingerlanniarlugu nunanut tamalaanut uppernarsassagaa. Iranimiut atorfilittaasa neqeroorut tamanna qaammatini arlalinni itigartittuarsimavaat, præsident Ahmadinejadili tv-kkut ippassaq apersorneqartilluni oqarpoq, tamanna ajornartorsiutitut isiginngikkini. Oqarluni uranip atorsinnaanngorsakkap 70 procentia Ruslandimut Frankrigimullu nassiunneqarsinnaasoq, taakkunanilu ikummatissiareriarlugu Iranimi nukissiorfittut misileraatini ikummatigineqarsinnaasoq. Tamanna USA-mit mianersortunnguamik akuerineqarpoq, oqarlutik, tamanna aatsaat nammineerlutik takugunikku upperilersinnaallugu. Tamanna tupinnarpallaanngilaq, tassami iranimiut atomip nukinga pillugu aaqqiagiinnginnermi ammanerunissartik ukiuni arlaqalersuni neriorsuutigisaraluarmassuk piviusunngortissanaguli. Atorfilittat isumaqatigiinniarnermut sivisuumik malinnaasimasut oqaatigaat tamanna ilisarnarluinnartoq, tassami iranimut killilersuiniarluni oqaluttoqalersorlu iranimiut inussiarnisaarnerulertarput. Maanna aamma taama pisoqaannarnersoq imaluunniit USA-p iligisaasalu utaqqisimasaattut allamik pisoqalerneranut tamanna takussutissaanersoq ulluni qaninnerni paasinarsissaaq.
