Iranimiut qinersinissamut pissanganartorsiorput

Iranimi præsidentimut tallimanngorpat qinersinissaq pissanngatigineqaqaaq. Præsidentinngorniuttut misissuinerni naligiiginnangajallutik qineqqusaarnerat sakkortusiartuinnarsimavoq. Manna tikillugu præsidentiusoq, Mahmoud Ahmadinejad, USA-mut akeqqersimaartuartoq isornartorsiorneqartuarpoq.
juunip 09-at 2009 11:10

Inuusuttut tituusintilikkaat Teheranip aqquserngini suaartarlutik unnukkut angalaalertarput, ullaassakkullu sisamap tungaanut ingerlaarrattarlutik.

Sapaatip akunnerini marlunni uffarnikuunngilaq, inuusuttut Mushavimik tapersersuisut suaartarput. Nikanarsarniagaallu tassa maanna præsidentiusoq, Mahmoud Ahmadinejad. Inuusuttorpassuit allagartarsuarnik nittarsaallutik suaartarput. Inuusuttullu angutaannaanngillat aammali arnat aqqusinerni angalaaqataapput allagartarsuit tuluttut allassimasut "Change" tassa "allannguineq" angallallugit, soorlu Obamap USA-mi qineqqusaarnermini aamma oqaaseq taanna atorluarsimagaa. Nutarsaarusuttummi naalagaaffinnut allanut, soorlu USA-mut akeqqersimaarneq taamaatikkusuppaat. Soorunalumi aamma illuatungaani Ahmadinejad tapersersorteqarpoq.

Unneqqarissuuvoq, tilliffigisarnatalu. Taamaammat qinertariaqarparput. Arnaq inuusuttoq Ahmadinejadimik tapersersuisoq suaartarpoq.

Tallimanngorpat paasissavarput Iranimi allannguiniartut qinerneqassanersut. Ukiulli 30-t matuma siorna Iranimi pikitsitsisoqarmat aatsaat taama pikkunartigisumik qineqqusaartoqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq