Iranip præsidentia Hassan Rouhanip atomip nukingata ulluani, National Nuclear Energy Dayimi, Teheranimi atomip nukinganik atortorissaarutit apriilip ulluisa qulingani isiginnaarpai. Assi: Ritzau Scanpix

Iranimiut atomimik nukiliornerat ilimagisamiit sukkanerusoq

Uranip 60 procentimik atorsinnaanngorsagaanissaa Iranip maanna aallartippaa, urani Iranimi aatsaat taama atorsinnaanngorsagaatigissalluni.

Uranip 60 procentimik atorsinnaanngorsagaanissaa sapaatit-akunnerata tulliani aallartinniarneqartoq Iranimi oqartussat pingasunngormat nalunaarutigaat.

Atorsinnaanngorsagaaneratali annertusarneqarnissaa aallartilereerluni.

Uranip atorsinnaanngorsagaanerata qaffasissusaa januaarimili 20 procentiusimavoq, maannali 60 procentinut qaffanniarneqarluni.

Iranip atomip nukinganik atuisinnaanera pillugu 2015-imi isumaqatigiissutigineqarmat, uranip atorsinnaanngorsagaasinnaanerata taama qaffasitsigisinnaanissaa sinningaatsiarlugu uranimik maanna atorsinnaanngorsagaasoqarniarpoq.

Uranip atorsinnaanngorsagaassusiata annerpaamik 3,67 procentiunissaa taamanikkut isumaqatigiissutigineqarpoq.

Assersuutigalugu atomimik qaartartorsualiorniaraanni urani 90 procentinik atorsinnaanngorsagaasariaqarpoq.

Iranip atomip nukinganik atuisinnaanissaa pillugu isumaqatigiissut 2015-imeersoq, Iranip, Naalagaaffiillu Peqatigiit Isumannaallisaaniaqatigiivini nunat ataavartumik ilaasortat, tassa USA, Kina, Tuluit Nunaat, Frankrig Tysklandilu atsioqatigiissutigaat.

Iranip atomip nukinganik atuisinnaanermi ilaata atorunnaarsikkiaartuaartinneqarnissaa 2015-imi isumaqatigiissutigineqarpoq. Iranip aningaasarsiorsinnaassusia eqqorniarlugu nunat tamalaat Iranimut immikkut sukannersumillu iliuutsitik taassuma saniatigut atorunnaarsikkiartuaassagaat isumaqatigiissutaavoq.

USA-p præsidenterisimasaata Donald Trumpip USA isumaqatigiissummit 2018-imi peqaatajunnaarsippaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat