Iranimit paasissutissanik pissarsiniarneq ajornarsivoq
Teheranimi ingerlaaqatigiittut Ahmedinejadimik tapersersuisuunerupput. Illuatungiliuttummi tapersersortimi tassanerpiaq akerliussutsimik takutitsissamaarnerigaluat unitsiinnarpaa, ippassaq ilatik arfineq marluk toqutaammata perulluliortoqalernissaa aarleqqutigigamikku. Taamaakkaluartoq pilersaarutaanngitsumik Teheranip avatinnguani Mousavip tapersersortai katersuukkamik, qinersinermi peqquserluttoqarsimammat qinersisoqaqqinnissaa piumasaraat. Iranimi pissaaneqarnerpaat palasit, nakkutilliisut siunnersuisuinik taaneqartartut, nalunaaraluarput qinersisut kisinneqaqqissaarneqassasut, tamannali Mousavip tapersersortaasa naammaginagu qinersisoqaqqinnissaa piumasaraat.
Nunat assigiinngitsut tusagassiortui pisortanik killilersorneqaqimmata, allaffitilluunniit qimaqqusaanagit, piffissap ingerlanerani Iranimiit nutaarsiassaqartitsiniarneq ajornarsiartuinnarpoq.
BBC-mi tusagassiortoq oqarpoq, aatsaat taama tusagassiortutut suliniarneq ajornartigisoq misigalugu.