Iranimi inatsisartunut qinersipput
Kikkut inatsisartunut qinigassanngortissinnaanersut qinersinermi nakkutilliisuutitanit aalajangerneqartarput.
Iranimi qinersisartut 44 millionit qinersisinnaatitaapput, amerlasuullu qinersiartornissaat naalakkersuisuinit kaammaattuutigineqarpoq. Nunamik aqutsinermik allannguiniartut ilaasa qinigassanngortissinnaannginnerat pissutigalugu avissaartuunneqarpoq allannguiniallu ilaat qinersiartorniaratik nalunaarlutik.
Qinersinermi qinersisartut amerlasuut qinersinerisigut allanngunianut iluaqutaanissaa neriuutigineqarpoq. Iranimi inatsisartuni ilaasortat 290-iupput taakkunanngalu allannguiniat aqqaneq-marluk ilaasortaallutik.
Ukiut sisamat matuma siornatigut inatsisartunut qinersineqarmat qinersisartut 40 procentii qinersiartorput. Ullumikkut qinersisartut 60 procentiisa qinersiartornissaat alaatsinaatsunit naatsorsuutigineqarpoq.
Inatsisartuni pissaaneq qinersinermi nakkutilliisuutitanit killilersimaarneqarpoq. Nakkutilliisuutitat palasinit innuttaasunit qinigaanngitsunit aqqaneq-marlunnik ilaasortaatitaqarpoq inatsisilerituunillu islamiusunik ilaasortaatitaqarluni taakkua siunnersuutinik itigartitsisinnaapput, upperisamut islamimut naapertuutinngitsunik siunnersuuteqartoqarpat.
