Iranimi illuatungiliuttuneersut arlallit tigusaasut

Iranimi naalakkersuinikkut eqqissiviilliornerit sakkortunerulermata, illuatungiliuttuneersut nuimasut ikinnerpaamik 18-it tigusarineqarput.
Allattoq Elisa Isaksen
decembarip 29-at 2009 13:31

Tigusanut ilaallutik illuatungiliuttunut siuttumut Mirhossein Mousavimut siunnersortit pingaarnerit pingasut, taassuma sakia, aamma Nobelip eqqissineqarnissaanut nersornaasiuttaagaanik nersornaatisisimasup Shirin Ebadip qatanngutaa arnaq.

Taamatut tigusarinnittoqarpoq, naak ilisimatuutut misissuisoq taanna Nooshin Ebadi politikkikkut suliniartunut akuusimanngisaannaraluartoq.

- Illuatungiliuttunut siuttup tigusaanissaanut piffissaq kisimi apeqqutaalerpoq, illuatungiliuttunut suliniaqatigiinnut, Mirhossein Mousavimit, siornatigut naalakkersuisunut siuttuusimasumit siuttuuffigineqartunut ilaasortat ilaat taama oqarnerarlugu Tysklandimi nutaarsiassaqartitsivik dpa taama nalunaarpoq.

Alaatsinaattunit arlalinnit aamma oqaatigineqarpoq, præsidentiusimasup Mohammad Khatamip siuttullu allat parnaarunneqarnissaat utaqqiinnarneqartoq.

Oqartussat nalunaarutigaat, naalakkersuinikkut eqqissiviilliortoqarnerani inuit arfineq-pingasut toqutaasut, taakkununngalu ilaalluni Mousavip jorngua. Siusinnerusukkut naalagaaffiup tv-qarfiatigut oqaatigineqarpoq, toqutaasut 15-iunerarlugit, kisitsisilli taakku ikinaagaanerarneqarput.

Soorlu aamma politiit oqaatigigaat, Teheranimi 300-t sinneqartut tigusaasimasut, illuatungiliutulli nittartagaanni oqaatigineqarluni, illoqarfiit pingaarnersaanni aamma Isfahanimi sapaatiummaannaq 900-t politiinit tigusaasimasut.

Mumisitsinerup sakkutuuinit sunniuteqaqisunit nalunaarutigineqarpoq, Iranimiut naalakkersuinikkut ingerlatsinerat, nunani allamiut tusagassiorfii Islamisiortullu mumisitsinerannut akeqqat, ataatsimoorlutik Iranimiut naalakkersuinerat ajortisarniarsarigaat. Naalagaaffiup tv-qarfianit oqaluttuarineqarpoq, inuit 10.000-ilikkaat suaartarsimanerarlugit:

"Siuttorput Ayatollah Ali Khamenei pillugu inuunerput pilliutigereriaannaavarput". Iranimi naalagaaffiup tv-qarfianit oqaatigineqarpoq, palasiunerit naalakkersuinerannut illersuilluni piareersaqqaanngikkaluarluni ingerlaaqatigiinnerit aallartinneqarsimanerarlugit.