Iranimi aviisi matuvoq
Titartagaq allarluinnaq Iranimi perulluliuutaalerpoq; aviisi pisortanit pigineqartoq sivisussusiligaanngitsumik matuneqarallarmat. Saaluallak Aseriamiusut oqaluttoq titartarneqarsimasoq saqqummersinneqarsimammat aviisimi sulisut arlallit paarnaarussaapput.
Iranimi ikinnerussuteqartut Aseriamiut aviisimi titartagaq saqqummersinneqarsimasoq akerliuffigalugu ippassaq aqqusinikkut ingerlaaqatigeereersut aviisi matuneqarpoq.
Nukappiaraq saaluallammut persiamiusut oqartoq titartarneqarsimavoq, saaluallaallu aseriamiusut qanoq oqarnersoq aperigaa takuneqarsinnaalluni.
Titartagaq saqqummersimatsiaannartoq kultureqarnermut ministerip Aseriamiut utoqqatserfigai.
Aseria Tyrkiamut qanittuaraavoq. Iranimilu innuttaasut 70 millionit sisamaraarterutaat Aseriamiuupput. Iranimi nunap iluani ministerip titartagaq pillugu oqaaseqarnermini akuerineqarsinnaanngilluinnartutut taavaa.
Aviisip matuneqarnera nalunaarutigineqarmat nassuiaaserneqarsimavoq Iranimi innuttaasut avissaartinniarlugit aviisi saqqummersitsisimagami matuneqarsimasoq. Teheranimilu unnerluussisuutitat pisortaat ullumi nalunaaruteqarpoq titartaasoq akisussaallunilu aaqqissuisoq unnerluutigineqarlutillu paarnaarussaareersut.
Iranimi naalagaaffiup tusagassaqartitsivia naalakkersuinermik suliaqartunit akuliuffigineqarluni aatsaat siullerpaamik matuneqarpoq. Tusagassaqartitsiviit arlallit eqqartuussiviit aqqutigalugit 2000-miilli matuneqartarput, upperisaqaqatigiinnut ajuallannarsinnaasunik imaluunniit naalagaaffiup isumannaallisaaneranut navianarsinnaasunik saqqummersitsisarnertik peqqutigalugu.
