Iranimi atomimik nukissiorneq suli isumaqatigiissutigineqanngilaq

apriilip 19-at 2006 16:57

Iranimi atomimik nukissiorneq pillugu nunat assigiinngitsut suli isumaqatigiinngillat. Aalajangernissaq apriilip naaneranut kinguartinneqarpoq.

Naalagaaffiit Peqatigiit Isumannaallisaasooqatigiivini nunat ilaasortaatitallit Moskvami ataatsimiinneranni Iranimi atomimik nukissiorneq pillugu isumaqatigiikkuunnaartoqarnerani Ruslandip nunanut allanut ministeria oqarpoq Iranip uranimik nukissiornera unitsinneqanngippat Iran iliuuseqarfigineqarsinnaanngitsoq.

Iranip arlaatigut pillaatisinissaa Ruslandip Kinallu akerleraat nunallu taakku marluk Naalagaaffiit Peqatigiit Isumannaallisaasooqatigiivini ilaasortaapput.

Naalagaaffiit Peqatigiit Isumannaallissaasooqatigiivisa marsip naanerani Iran piumaffigaat uranimik nukissiorneq apriilip naanerani unitsinneqassasoq Iranimilu naalakkersuisut atomimik nukissiorneq pillugu apeqqutinik akissutissaminnik taamanikkornissaanut piareersimatitseqquneqarput.

Tuluit Nunaanni nunanut allanut ministeri oqarpoq piumasaqaat taanna Iranimi naalakkersuisunit naammassineqarsinnaanersoq nammineq qularalugu. Iranimit aallartitat aaqqiagiinngissutaasoq isumaqatiginninniutigalugu Moskvamut aallarput.

Inuit iluaqutissaannik atom atorlugu nukissiortoqartoq Iranimit nalunaarutigineqarpoq.

Ruslandimi naalakkersuisut maannagaaq iliuuseqarusunngikkaluarlutik Iranimi naalakkersuisut iluuserisaat nuannarivallaanngilaat.

Naatsumik oqaatigalugu nunarsuarmioqatigiit Iranimi naalakkersuisut qanoq iliuuseqarfigissallugit suli nalornipput.