Iranimi arnat atisalersortussaanermut nunap peqqussutaanik unioqqutitsisut sakkortunermik pillarneqartalissasut
Iranimiut arnartaasa atisalersortussaanermikkut nunap peqqussutaanik unioqqutitsippata, sakkortunerusumik arnanut taakkununnga pillarneqaataasalernissaa Iranimiut Inatsisartuisa pingasunngornermi inatsisissatut siunnersuutaat akuersissutigaat.
Taama Iranimiut nutaarsiassaqartitsiviat Irna allappoq.
Inatsillu taanna nutaaq imaqarpoq, arnaq atisalersortussaanermigut unioqqutitsippat arnaq ukiut qulit angullugit parnaarusimaneqartassasoq.
Taannalu akuerineqarpoq, ukiunilu pingasuni misilinneqaqqaassasoq oqaatigineqarpoq.
Inatsilli tamakkiisumik akuersissutigineqarnissaminut amigaateqalaarpoq. Iranimimi paarsisut siunnersortaannik taasat tamatumunnga akuersinissaat amigaataalaarsimavoq.
Iranip inatsisaa Shariamik tunngaveqartumik aaqqissuussaasoq naapertorlugu arnat nasartaammik hijabimik taaguutilimmik nutsatik asseqqissaarlugit nasartaateqaqqusaapput. Aammalu nerutuumik takisuumik atisaqaqqusaallutik.
Arnat arlallit ukiuni kingullerni inatsit taanna pissutaalluni qimaguttarput.
Soorluttaaq ukiup ataaserluinnaap matuma siorna akerliussutsimik takutitsisoqarnerani arnaq inuusuttoq Mahsa Amini toquvoq.
Taanna iranimiut sakkutuuinit tigummineqarnermini ilisimajunnaarpoq toqunissilu sioqqullugu ulluni pingasuni komaqqalluni.
Taannami tigusaavoq nasartaatini hijabi iluamik atilluarsimanngimmagu.
Politiit naapertuilluartitsiniat arnap toquneranut pisuutitaasut arlaqarput.
