Iran suli ulorianarnerarpaa
USA-p præsidentia isumaqartuarsinnarpoq Iran nunarsuarmioqatigiinnut suli ulorianartorsiortitsisoq, tamannalu pivoq naak USA-p paasiniaasartuisa ippassaq inernileraluaraat Iran ukiut sisamat qaangiummatali uran-imik sakkussiassaliornissamut piareersaanertik unitsikkaat. Taamaakkaluartorli Bush isumaqartuarsinnarpoq Iran ilisimasaqassutsikkut pissarseratarsinnaanermigut nunarsuarmioqataasunut suli ulorianartorsiortitsisoq.
Iranip atomitalinnik sakkuliorniarnini siornatigut isertuuttareerpaa, taamaammallu Iranip atomitalinnik sakkuliorsinnaanera akiorniartuartariaqarpoq, Bush tusagassiortunik ullumi katersortitsinermini oqarpoq, USA-mi isertorlutik paasiniaasartut nalunaarusiaat nutaaq soqutaavallaanngitsutullusooq isiginiarsaralugu.
- Irani ippassartuulli ulorianartsigaaq, paasiniaasartulluunniit oqaraluarpata 2003-mili atomitalinnik sakkussiorunaaarsimasoq, Bush oqarpoq. Nalunaarusiaq nutaat Buship naalakkersuisuutitaasalu anguniagaannut akornutaarataannaavoq, USA-mmi Naalagaaffiit Peqatigiit aqqutigalugu Iranip pillaammik sakkortuumik iliuuseqarfigineqarnissaa anguniaraluaramikku, Iranip atomitalinnik sakkussiorniarnera annerusumik pissutigalugu. Buship Ruslandip præsidentia, Putin atassuteqarfigisimavaa isumaqatigiissimallutillu Iranip atomitalinnik sakkussiorsinnaanermut ilisimasaat killilersimaarniarlugit pillaammik iliuuseqarfigiuartariaqartoq.
- Uanga præsidentiutillunga Irani atomitalinnik sakkuliorsinnaalissanngilaq, Bush naggasivoq.