Iran-imiut sakkussiortuarsinnarput

Nunarsuarmioqatigiit atomip nukinganik nakkutilliisuutitaata IAEAp nunat tamat peqatigiiffiata isumannaallisanermi siunnersuisoqatigiivinut nalunaarutigaa Iran atomip nukinganik sakkussiatut atorneqarsinnaasunik sanaartortuarsinnarnera.

Nunarsuarmioqatigiit Iranip atomip nukinganik innaallagissiorfiliornerartuarnera upperiunnaaraluttuinnarpaat.

Paasineqarsimavoq ukiut kingulliit 18it Iran qaartartunik atomip nukinganik sakkortigisumik qaarsinnaasunik sanaartorniarsariuarsimasoq.

Paasisalli ilallugit pitsaanerulinngivissimavoq paasineqarmat Pakistanimi atomip nukinganik qaartartuliorsimasumit dr. Khaninimit titartakkat qaartartuliornermut ilitsersuutit nassaarineqarmata; taannarpiaavorlu Koreap avannarliup Libiallu atomip nukinganik qaartartuliornissaannik ilitsersuisimanini nunamini atorfimminit soraarsitaassutigisimasaa. Iranimiut nalunaarput dr. Khan piumaffigineqarani titartakkanik tunniussisimasoq. Tamannali Kitaamiunit utoqqatsissutitut, tusaatissatullu tigujumanngilluinnarpaat.

Atomip nukinganik sakkussiunnginnissamik nakkutilliisuutitat Iranimi pisut nakkutigeqqissaarpaat, naatsorsorsimavaammi ukiut pingasut 15illu ingerlaneranni atomip nukinganik Iranimiut qaartartorsualiorsinnaalissasut.