Iran iliuuseqarfigineqassanngilaq
Iran-ip uran-imik atomimik nukissiorfinnut sakkussanulluunniit atorsinnaanngorsaanini peqqutigalugu iliuuseqarfigineqassanngilaq.
Naalagaaffiit peqatigiit illersornissamut ataatsimiititaliaa Iranip uranimik atomimik sakkussianut nukissiorfinnulluunniit atorsinnaanngorsaaneranik unitsitseqqusilluni aalajangersaassagaluarpat, Kina akerliuniarluni nalunaaruteqarpoq.
Kina illersornissamut ataatsimiititaliami ataavartumik ilaasortaavoq, siunnersuutillu takkuttut suugaluartulluunniit taasititsissutigineqarnissaat unitsissinnaavai.
Naalagaaffiit peqatigiinnut Kina-minngaanniit aallartitap Iran-ip atomimik sakkussaliorsinnaanera aamma ernummatigaa. Naqisuserpaali Iran-i atomimik sakkussaliornersoq uppernarsineqarnikuunngimmat.
Iranimi præsidentip qaammat ataaseq qaangiummat nalunaarutigaa Iranimi uranimik atomimut atorsinnaanngorsaasinnaalersimasoq. Atomimik sakkussaliornermi uran-imik atorsinnaanngorsaaneq pisariaqarluinnarpoq.