Iran Bahrainilu nunanut akerliuffiusunut ilanngupput

Qaammatip kingulliup ataatsip ingerlanerani Igitsinimi Tunesiamilu naalakkersuisunik uppititsinerit Araberit nunaannut allanut siaruaatilerunarput. Iranimi aamma Bahrainimi ullumi akerliussutsimik takutitsisoqarpoq.
Allattoq Elisa Isaksen
februaarip 14-at 2011 16:43

Iranimi akerliussutsimik takutitsisut tuusintilikkaat, Igitsinimiunut Tunesiamiunullu tapersersuillutik aqqusinermi ingerlaaqatigiittut, Teheranimi Iranimiut politiivinit sakkortuumik ullumi saassutarineqarput.

Akerliussutsimik takutitsisut sakkutuunit isumannaatsuunissamik isumaginnittunit amerlaqisunit unitsinneqarput, taakku gassimik qulliliornartumik patroninillu kumminik sakkoqarlutik akerliussutsimik takutitsisut avissaartortippaat, ikinnerpaamillu 18-it tigusaralugit, illuatungiliuttullu siuttui angerlarsimaffimminnit aneqqusaanatik.

Maannamut oqaatigineqartut naapertorlugit, akerliussutsimik takutitsisut 4.000-it aqqusinermiipput sulilu amerliartorlutik, ingammik Iranimi illoqarfiit pingaarnersaata Teheranip qiterpasissuani illoqannginnersami Azadimi. Iranimi aamma illoqarfinni kujasinnerusuni marlunni ullumi akerliussutsimik takutitsisoqarpoq.

Naalagaaffimmi eqqissisimasutut isigineqartaraluartumi Persiap Kangerliumanersuaniittumi Bahrainimi, illoqarfiit pingaarnersaanni illoqarfinnilu minnerusuni arlalinni aamma ullumi akerliussutsimik takutitsisoqarpoq. Tamaani Bahrainip kunngia kisermaassilluni naalakkersuisuusoq naalakkersuisuilu ingammik inuusuttut akerliuniarfigaat.