Iran atomimik sanaartorfinnik isertuussisimasorineqarpoq

Uranimik atomimik sakkussianut atorsinnaanngorsaanerminik Iran ukiuni arlaqartuni isertuussisimavoq, taamaattumik Iranip amerlanerusunik peqarnerminik isertuussisimasinnaanera Naalagaaffiit Peqatigiit atomi pillugu nakkutilliisoqarfiannit ilimagineqalerpoq.
novembarip 16-at 2009 15:06

Uranimik atomimik sakkussianut nukissiornermulluunniit atorsinnaanngorsaanerminik Iran ukiuni arlaqartuni isertuussisimavoq, tamannalu Iranip allanik amerlanerusunik peqarnerminik isertuussisimasinnaanera pillugu apeqqutinik saqqummersitsisoq, nakkutilliisoqarfik nalunaarummi nutaami allaaserinnippoq.

Illoqarfiup illernartitaasup Qomip qanittuani uranimik atomimik sakkussianut nukissiornermulluunniit atorsinnaanngorsaasarfimmik nutaamik sananerminik tamannalu 2007-imi allartissimasoq Iran, septembarimi Naalagaaffiit Peqatigiit atomi pillugu nakkutilliisoqarfianut nalunaarpoq.

Nakkutilliisoqarfiulli nalunaarutaani nutaami tamanna eqqortuunngitsoq allaaserineqarpoq. Sulineq tamanna 2002-mili Iranip aallartissimagaa pappiaqqat atorneqartut takutikkaat oqaatigineqarpoq.

Iranip atomimik sanaartorfinnik manna tikillugu isertuussisimanera pillugu paasissutissat, sumiiffimmi susoqarneranik paasisaqavikkumalluni, nakkutilliisoqarfimmi sulisut piaarnerpaamik nakkutilliinermik ingerlatsilernissaannik nunat killiit piumasaqaateqartippaat.

Nakkutilliisut sanaartorfimmut akornutitaqanngitsumik killilersugaanngitsumillu isersinnaanerat sapaatit akunneri pingasut matuma siorna Iranip akuersissutigisimagaa, nakkutilliisoqarfik nalunaarummi allappoq, taamaakkaluartoq sanaartorfik sorsunnermi atorneqarsinnaasunut atorneqanngitsoq Iranip suli uppernarsartariaqarpaa.

Atomimik pilersaarutini taamaallaat nukissiornermut tunngassuteqartoq Iranip aalajangiusimavaa. Iranilli atomimik sakkussiarsuarnik peqalernissaq tunaartarigaa, nunanit killernit ernummatigineqarpoq.

Natanzimi sanaartorfimmut angisuumut, taanna Israelimit saassunneqarluni aserussagaluarpat Qomimi sanaartorfik sillimmatitut sananeqarsimasoq Iranip nakkutilliisoqarfimmut nassuiaatigivaa. Tamannali paasiuminaatsuusoq nunani killerni aallartitat atomilu pillugu immikkut ilisimasallit oqaatigaat.

Qomimimi sanaartorfik ima angitiginngilaq, atomi atorlugu nukissiorfimmi atorneqarsinnaasunik uranimik akuiakkamik pilersitsisinnaalluni. Paarlattuanik atomimik qaartartorliornermut, ataatsimik marlunnilluunniit, atorneqarsinnaalluartumik ukiumut pilersitsisinnaassuseqarpoq.