Irakimiut timmisartuutitik sorsuutit nassaaraat

Amerikami aviisi New York Times taama allaaserisaqarpoq, tassa Irakimiut aallartitaasa Serbiamut, kisermaassilluni naalakkersuisuusimasumut Saddam Husseinimut attaveqarfigissaartumut, tikeraareerlutik taama paasisaqarput.

Taakkua suliakkerneqarsimapput, Irakimi kisermaassilluni naalakkersuisuusimasup, nunanit killernit pillaatitut iliuuseriniarneqartut pinngitsoorniarlugit, Serbiami sunik toqqorterisimanersoq paasiniassallugu, tassalu nassaarineqartut ilagaat sakkutuut timmisartui 19-it Sovjetunionimi sanaat.

Sakkutuut timmisartui taakku 19-it 1989-imi Iranimut sorsunnerup nalaani iluarsaanneqarniassammata Serbiamut nassiunneqarput, taamanikkulli Irakimiut aasinnaasimanngilaat, Nunat Killiit pillaatitut iliuuseqarnerat pissutigalugu.

Maannalu Irakip timmisartut taakku piaarnerpaamik utertikkusuppai, tassami nuna timmisartunik sorsuutinik maanna pigisaqanngimmat. Timmisartumiimmi saassussiniaraangamik timmisartut assartuutit alapernaarsuutillu aamma qulimiguullit atortariaqartaramikkik.

Serbiamiut oqaatigaat timmisartunit sorsuutinit nassaarineqartunit marluk ingerlaannartumik Irakimiunut utertinneqarsinnaasut, sinneruttullu piaartumik suliarineqariarlutik utertinneqarumaartut.