Irakimiut angerlartinneqassapput
Tassami Irakimiut aallartitaasa Danmarkimiissimasut inunnit 35-usunit 34-t suminngaanneersunerat kinaassusiallu nalornissutaasoq paasiniarmassuk. Taamaalilluni taakkua piaarnerpaamik Irakimut aallartinneqassasutut isikkoqarput.
Danmarkimi politiit Irakimiullu aallartitaasa Irakimiunik qimaasutut pineqarumallutik itigartitaasimasunik killisiuinertik maanna naammassisimalerpaat, taakkunanilu ataasiinnaq taamaallaat kinaassusersisimanagu. Inuk taanna iperagaavoq suliarli misissuiffigeqqinneqassalluni. Aallartitat Danmarkimilu politiit oqarnerat naapertorlugu inuit 34-t Irakimiuusut angerlartitaanissartik piareersalereersinnaavaat, Danmarkimi politiit nunami allamiunut immikkoortortaanni pisortaq Hans Viggo Jensen oqaluttuarpoq.
- Pineqartut kiffaanngissusiiagaapput piffissarlu taamatut pineqarfiat sivitsussallugu kissaatiginngilarput.
Qimaasutut pineqarumallutik qinnuteqaraluarlutik itigartitaasut killisiorneqarnermik nalaanni arlaatigulluunniit inatsisilerituumik ikiorteqarsimanngillat, tamannalu immikkut paasisimasalinnit isornartorsiorneqarluni. Tamatumunnga Danmarkimi politiit nunanut allanut immikkoortortaqarfianni pisortaq Hans Viggo Jensen ima oqarpoq:
- Eqqortuusorisarput naapertorlugu aalajangiivugut tunngavilersorlugulu, taanna naammagittaalliutigineqarpoq nunanullu allamiunut tunngasunut ministereqarfimmiilluni, taamaalillunilu ministereqarfik taanna tassaalluni aalajangiisussaq. Danmarkimi qimaasunut ikiuiniaqatigiiffimmi qimaasutut pineqarumallutik qinnuteqartut angerlartitaasinnaanerat naammagittaalliuutigineqarpoq. Qimaasutut pineqarumasut pillugit immikkoortortaqarfimmi pisortaq Anne la Cour ima oqarpoq:
- Irakiminngaanneersuunerat arajutsisimanngilarput, tassami taakkua taama oqartuartarmata, angerlartitaanissaalli assorsuaq ajuusaarutigaarput, tassami isumaqartuaratta taakkunannga amerlaqisut Danmarkimi najugaqarnissaminnut akuersissuteqarfigineqartariaqaraluartut.
