Irakimiut amerikamiullu suli saassussisaqattaarput

Irakip illoqarfiisa ilaanni Samarrami amerikamiut irakimiullu sakkutuui pikititsinianik suli saassussisaqattaarput Bagdadimilu pikititsiniat upperisaqaqatigiit ullumi toqoraasimasut nalunaarutigineqarpoq.

Irakimi naalakkersuisut, irakimilu sakkutuut, amerikamiullu sakkutuui irakimiittut, Irakimi angusaqarluarusupput, taamaattumik amerikamiut irakimiullu sakkutuui ikioqatigiillutik ippassaq Bagdadip avannaani pikititsinianik saassussipput. Saassussinermi irakimiut sakkuutuisa pikititsinianik nakkutilliisinnaanertik takutinniarpaat, mannami tikillugu amerikamiut taamatut nakkutilliisuusimapput. Saassussinerlu qaangiuteriarpat irakimiut sakkutuui iluatsilluartumik eqqissisimatitsisinnaanersut paasiniarneqarpoq.

Irakimiut amerikamiullu sakkutuui 1500-t timmisartunut 60-inut ilaallutik illoqarfik saassunniagartik orneriarlugu illumiit illumut pikititsinianik ujaasipput.

Taamatut ujaasinerat pikititsinianit tupaallaatigineqarpoq. Massakkullu pikititsiniat toqqortiterluaqqariarlutik Bagdadimi shiasiortunik saassussipput.

Shiasiortut ulluni makkunani 10.000-ilikkuutaarlutik illoqarfiit ilaannut Kabalamut Pruffiitip Muuamaap ningaavata ilerranut ilerfiarrapput. Taamatut ilerfiartoqaleruttornerani ullaaq biili angutinik pingasunik ilaasulik ingerlaaqatigiit eqqaannut unippoq eqqaassisoqarmallu inuit pingasut toqutaapput arlallillu ikilerneqarlutik. Tamanna pissutigalugu amerikamiut sakkutuuisa ingerlaaqatigiinnik nakkutilliinertik aallartippaat.

Amerikamiut irakimiullu sakkutuui sumi tamaani nakkutilliisinnaanngillat, taamaattumik kikkut tamarmik sapaatip akunnerata naanerani qanoq pisoqarnissaa ernummatigaat.