Irakimiut 200-t Kastrupimut ullaaq tikipput

Irakimiut kingulliit 200-it timmisartumik Kastrupip mittarfianut ullaaq tikiunneqarput, illersornissamut sakkutuunit Irakimiit qimarnunneqarlutik.

Qimarnussut tassaapput, Irakimiut oqalutsit ilaqutaallu, Irakimiut oqalutsit qallunnat sakkutuuinut Irakimi oqalutsitut atorfeqarsimapput, maannakkullu inuunerminnik navianartorsiortutut nalilerneqarsi-mallutik, Irakimi pikitsitsinianit malilersorneqarnertik pissutigalugu, nunaminnummi killuussisutut isigineqaramik, qallunaat sakkutuuinut oqalutsitut ikiuussimagamik. Danmarks Radio-mi ilanngutassiortup oqaluttuaraa Irakimiut 200-it ullumikkut Danmarkimut tikinnerisa tunuliaqutaat.

Irakimiut oqalutsit januaarip ulluisa 18-ianni inuunerminnik navianartorsiortitaalerput qallunaat oqaatsit pillugit offieriisa Irakimi oqalutsit inuunerisa navianartorsiortitaasinnaanerat toqqissisimajunnaarutigimmassuk.

Isumaqarpunga Irakimi oqalutsit toqutaasortaqarumaartut.

Aallaqqaammulli illersornissamut ministerip Søren Gadep Radio Aviisikkut oqaaseqarnermini Irakimi oqalutsit ikiorumanngeqqaaraluarpai, sakkutuunut nallersuullugit. Danmarkimilu pissutsinik uparuartuisartut sakkutuujusimasullu akuliunnerisigut Irakimi Oqalutsit atugaat sukumiisumik oqallisigineqalerput.

Illua´tungiliuttut pissutsinut oqaloqataalerput, ministeriunerullu Anders Fogh Rasmussenip aprilillu qaammataani uppernarsarpaa Irakimiut oqalutsit ikiorniarlugit iliuuseqartoqassasoq.

Soorunalimi Irakimiut oqalutsit qallunaat sakkutuuinut ikiuulluarsimasut imminiiginnarneqassanngillat.

Irakimiulli oqalutsit ikiorneqarnissaminnik nalornillutik qaammatini pingasuni utaqqipput, inuuniarnerallu navianartorsioraluttuinnarluni.

Ministeriunerullu neriorsorpaa ikiorneqassaqqaartut.

Naalakkersuisooqatigiit Det Danske Folkeparti suleqatigalugu juunip 18-ianni isumaqatigiissutigaat Irakimiut oqalutsit ilaqutaallu Danmarkimi qimaasutut nunassinnissaminnik qinnuteqarsinnaasut.

Ullumikkullu juulip ulluisa 20-ianni Irakimiut oqalutsit 22-it ilaquttatillu, siornatigullu sulisuusimasut 130-it Danmarkimut nunassillutik tikipput.