Irakimiu oqalutsi marlunnik nuliisarluni Danmarkimut tikippoq
Irakimiut 200-t missaanniittut sakkutuunit Danmarkiliaanneqartut maanna Danmarkimiinnissamut qinnuteqaassunneqartut ilagaat oqalutsi 41-nik ukiulik marlunnik, 32-nik 34-nillu ukiulinnik nulialik taakkualu meeraat pingasut.
Taakkua Irakimi katissimallutik ilaqutariiupput, Danmarkimili inatsisinik unioqqutitsisuupput, tassami Danmarkimi arlariinnik nuliaqarneq inerteqqutaammat.
Dansk Folkepartiimeersup Søren Espersenip, oqalutsit Danmarkiliaanneqarnissaannik naalakkersuisunik isumaqatigiissuteqartup, naalakkersuisut iliuuseqarnissaat piumasaraa.
- Soorunami naalakkersuisut assuarnartoq tamanna iliuuseqarfigissagaat neriuutigaara. Aamma ilisimateqqaarnata Danmarkiliaanneqarsimammata tupigusuutigaara, uagummi tamanna pillugu naalakkersuisunik isumaqatigiissuteqaratta, aamma soorunami Danmarkimi arlariinnik nuliaqarneq akuerisinnaanngilarput, Søren Espersen oqarpoq.
Taamaattorli qimaasutut Danmarkimi akuerineqarnissaat pineqarpoq, matumanilu nunagisaminni ulorianartorsiornersut isiginiarneqartarpoq, katissimanersut qanorlu katissimanerat apeqqutaatinnagu.
Danmarkimi nunanit allaneersunut allaffeqarfimmi isumaqartoqarpoq marlunnik nulialik kommunimut aalajangersimasumut najugassinneqarpat, tamanna aallaqqaammut kommunip ajornartorsiutigissagaa. Suliassarlu ingerlateqqinneqaruni ministeeriaqarfinni arlalinni suliassanngoriaannaavoq, qularnaannerpaavorli inatsisinut atortitsinermut ministerimut Lene Espersenimut imaluunniit ilaqutariinnermut ministerimut Carina Christensenimut suliassanngortinneqarnissaa, inatsisimmi aappariinnermut tunngasut taassuma susassarfigai.
