Irakimi sakkutuut nutaanik akiugassaqalersimagunarput
Amerikamiut Irakimilu naalakkersuisut sakkutuui, Irakimi nutaanik akiugassaqalersimagunarput.
Taakkua tassapput Sunni- aamma Shiamuslimit ataatsimoortut, taakkua ilaat 300-t illoqarfiup Nadjaf-ip eqqaani akersuuterujussuartoqarnerani toqutaasimapput.
Ataatsimoortut taakkua aaqqissuulluagaapput, sakkutuutut atisalersorsimallutik ilaallu niaqqumikkut tassilersimapput allagartalimmik: Qilaap sakkutuua. Sakkugissaaqaat ilaatigut eqqarasuartaatinik qaartartunillu sakkulersorsimallutik.
Ullup unnuallu ingerlanerani illoqarfiup Nadjafip eqqaani amerikamiut irakimiullu sakkutuuinut akersuussimapput. Upperisarsioqatigiit sorsukkumatuut 1000-it missaanniittut qamussuarnit sorsuutinit timmisartunillu F-16-init saassunneqarsimapput. Oqaatigineqarpoq 300-t toqutaasimassasut amerlaqisullu tigusarineqarsimasut. Akersuunnermi amerikamiut sakkutuui marluk toqunneqarput, tassa qulimiguuliat nakkartinneqarmat toqunneqaramik. Irakimiullu sakkutuui pingasut toqunneqarsimapput, arfinillit maqaasineqarlutik 40-llu ikiligaasimallutik. Upperisarsioqatigiit ullut naggatissaannik oqaluussisartumit aqunneqartut oqaatigineqarput. Taanna oqaatigineqarpoq imminut taasimasoq profetersuarmut takkuttussamut nunarsuarmi tamarmi naapertuilluarnermik eqqussisussamut sioqqutsilluni takkuttuunerarluni.
Taakkua saassunneqarput tusatsiarneqarsimammat Nadjafimi shia-muslimit palasii ullumikkut toqunniarlugit pilersaaruteqartut. Shia-muslimit upperisarsiornerminnut atatillugu ullumikkut aqagulu nalliuttorsiortussaapput, tassani pineqarluni profetip Muuamaap ernutaata toqutaasimanerata eqqaaniarneqartarnera, tamannalu patsisaalluni Islamimik upperisallit marlunnut avissimapput, tassa sunni- aamma shiamusliminut.
Illoqarfimmi iluartuutitami allami inuit millionit aappaata affaanik amerlassuseqartut Kerbalami ullumikkut katersuussimapput, tassani sakkutuut politiillu 10.000-it saassussisoqarnissaa pinngitsoortinniarlugu piareersimatinneqarput.
Upperisarsioqatigiit siuttuat saassussinermi toqutanut ilaanerarlugu nutaarsiassaqartitsivimmit Ritzauimit oqaatigineqarpoq.
