Irakimi qaartartumeerisaqattaartuarsinnarput
Lastbiilit marluk naalakkersuisoqarfiup ungasinngisaani qaarput. Ataaseq immikkoortortaqarfimmut qorsummut nakkutigilluagaasumut qanittumi Bagdadimi nunami allamiut amerlanerpaat najugaqarfianni.
Saassussinerit Bagdadimi annilaarutaapput. Siorna februaarip aallaqqaataani inuit 92-it qaartartunit toqutaammatali ulloq toqutaasoqarfiunerpaasoq DR-imeersoq Thomas Ubbesen oqarpoq.
Bagdadimi tamanna illersornissamut tunngassuteqarpoq Irakimilu illoqarfissuit annerpaat allanngorsimapput, tassami Amerikamiut sakkutuutik qaammatit marlussuit ingerlaneranni illoqarfiit qeqqanninngaanniit sakkutooqarfinnut inoqajuitsup eqqaaniittunut illuartissimammatigik, taamalu Amerikamiunik aqqusinerni isumannaallisaasuerulluni. Isumannaallisaanermik isumaginninnissaq tamanna Irakimiut sakkutuuisa suliassaraat, taamalu qanoq pitsaatigisumik isumannaallisaasoqarnersoq oqallisigineqarsinnaalluni. Ullumikkut pisut takutippaat taakkua suliassartik soorlu ajornartorsiutigigaat.
- Saassussisaqattaartummi taakkualu tunuliaqutaasa taamatut saassusserujussuaqattaarlutik suna anguniaramikku?
- Tamanna oqaatigineqarsinnaanngingajappoq, pissutigalugu pikitsitsiniat assigiinngisitaartorujussuummata naggueqatigiinnullu sunut tamanut agguataarsimallutik. Al Qaida tamakkua ilagaat, taakkuami Bagdadimi ukiut marlussuit matuma siornagut saassussisarsimapput, Amerikamiulli isumaqarput taakkua Bagdadimit pinngitsaalillugit anisinneqarsimasut illoqarfiullu Muzulip eqqaani imminnut illersorniarlutik nunngutaaminnik pallittaalisaqartut. Al Qaidap tamakkua piliarisimassappagit taava allanngorluinnartoqarsimassaaq Bagdadimiit anisitaariarlutik uteqqissimassammata. Taamaaliornerat, tassalu saassussinernik ataqatigiissaarinerat, tulleriiaaginnarnillu saassusisarneq tassaavoq Al Qaidap periaasia. Ajattuinnarneqarsinnaanngilaq maanna taakkua Bagdadimi sakkutuuliisimanissaat.
- Amerikamiut pisumi taamaattumi qanoq iliorsinnaappat?
- Tamanna Barack Obamamut Amerikamiunullu nalornisoortitsisorujussuuvoq, suli taakkua Iraqimi 140.000-inik sakkutooqarput, taakkuali pisoqarfiup avataaniipput, Amerikamiullu tungaannit suliassaq tassaalluni, taakkua nunamit tamaanngaanniit anisinnissaat kingusinnerpaamillu 2011-mi. Taamaalilluni toqoraanersuaq amiilaarnaqaaq qanorlu iliuuseqartoqarsinnaanani, iliuuseqarniaraannilu taava Irakimi naalakkersuisunik tamanna nikanarsaanerussaaq attanneqarsinnaanngitsoq. Iliuuseqarnaveersaaraanni taava Irakimi demokratiimik misileraaneq Amerikamiut aallartissimasaat 140.000-nik sakkutuulersorfiusoq ajalusoortoq takuneqassaaq.
