Irakimi kikkut ministerinngussanersut pissanngatigineqarpoq
Irakimi qinersereernerup kingorna naalakkersuisunngortut siulittaasortaavata, Nouri al Malakip, kikkut ministerissatut toqqassanerai nunaqqataanit, nunarsuarmioqatigiinnillumi, pissangatigineqarluni utaqqineqarpoq.
Toqqaanissaq ajornaatsuinnaanavianngilaq, tamat oqartussaaqataanerat Irakimi ilitsoqqussarineqanngilaq.
Oqarasuaatillu angallattakkap sianerneragut ajortoqangajalluinnarpoq.
Irakimi inatsisartuni siulittaasortaaq Sunniusoq, Mahmoud al-Masadjani, TV-kkut toqqaannartumik ataasinngormat apersorneqaleruttortoq, inatsisartunut ilaasortat ilaata arnap Shiasiortup, Roufran al-Sahidip,siulittaasup saniani qeqartup, oqarasuaataa angallattagaq, Shiasiortut qinuleraangamik erinaataannik nipilik, ersarissivilluni tutsiussimavoq, toqqaannartumillu aallakaatitsisoqarmat Irakimi tamarmi tusaaneqarsinnaasimalluni.
Inatsisartut siulittaasuata paarsisuata oqarasuaat angallattagaq attaveeqquaa; attaveereersimasoralugu arnaq isumasimanngilaq; siulittaasoq oqaloqqileruttortoq sianeqqimmat, siulittaasup paarsisuata arnap paarsisua tilluppaa, uierneqalerporlu, tamannalu toqqaannartumik isiginnaarneqarsinnasimalluni – aallakaatitsissulli pilertortumik qamipallanneqarpoq.
Inatsisartullu siulittaasuata paarsisua ippassaq toqunneqarsimavoq, ilisimaneqanngilarli ataasinngormat pisimasumut attuumassuteqarnersoq.
Irakimi inatsisartut ippassaq ataatsimiinneranni ilaasortap arnap shiasiortup paarsisumi pineqarnera naammagittaalliutigigaalu assortuunneqalerpoq, inatsisartullu siulittaasua ilanilu ataatsimiittarfimmit aninissaminnik sioorasaarigaluariarlutik, eqqarsaqqissaartungariarlutik, ataatsimiinnerat nanginneqarsinnaasimavoq.
