Irakimi inuiaqatigiit sorsuutilernissaat ernummatigineqarpoq

februaarip 23-at 2006 10:54

Irakip illoqarfiisa pingaarnersaani Baghdadimi oqaluffiit aserorterneqarsimapput inuillu 100t sinnillit toqutaasimassangatinneqarlutik. Ippassaq qaartartumeerisut anguniagartik piviusunngortilerunarpaat – Irakimi inuiaqatigiit sorsuutilernissaat.

Ulloq qaammat, Irakip illoqarfiisa pingaarnersaani Baghdadimi takussaapput inuit assaat tunuinut qilersukkat, uungaaraq aallaasat maaniinnarmiittut – toqutat tamarmik angutaapput sunnisiortuugunarlutillu.

Inuartarinnittui tassaassangatinneqarput Irakimi isumannaallisaanermi sakkutuut, shiasiortut; ippassaq illernartitamik qaartinneqarneranut atatillugu akiniaasimasut.

Illoqarfiit annersaata tulliani Basrami politiiusut tigusanik parnaarussivimmiittunik aqqaneq-marlunnik anisitsisimapput; ullaarlu nassaarineqarput sumi tamaaniittut – toqunneqarsimallutik. Angutit irakimiut arfinilllit, arfinillillu nunanit allanit araberisut oqaaseqarfiusuneersut.

Muamaamik upperisaqaqatigiit – marluinnulli avissaarsimasut – Shiasiortut ukiuni arlalinni eqqissisimasimapput – illuatungaani Sunnisiortut Usama bin-Ladenimut attuumassutillit siunertarisungavaat Irakimi inuiaqatigiit sorsulernissaat - iluatsilerunarlugulu.

Ippassaq illernartitamik qaartartumeerinermi pisuutitsinerit ilagigujaat pisuusut pingajui - juutit – taakkuuppummi muamaamik upperinnittut akeravissui.

Irakimi pilersaarut malillugu ingerlasoqalerpoq – tassalu Usama bin-Ladenip pilersaarutaa.