Irakimi innuttaasut imminnut sorsuutilernissaat piviusunngulerunarpoq

Amerikamiut naalakkersuisuisa annilaanngatiginerpaasaat piviusunngulerunarpoq.

Irakimi innuttaasut imminnut sorsuutilernissaat USA-p illersornissamut ministeriata, Donald Rumsfeldip, Kangianilu Qiterlermi amerikamiut sakkutuuisa qullersaata piviusunngulersoraat.

Amerikamiut inatsisartuini ippassaq tusarniaasoqarmat inatsisartuni ilaasortat taama kalerrinneqarput.

USA-mi præsident Buship præsidentiunerata nalaani Amerikami inatsisartuni tusarniaasoqaraangat Republikaanerit Demokraatit atorfilittallu imminnut tigunngujoortuinnanngorlutik oqallittarput. Irakimi sorsunneq pillugu tusarniaasoqaraangat ingasannerpaasarput. Ippassarlu Irakimi pissutsit tusarniaaffigineqarmata aamma sakkortugaatsiartumik assortuuttoqarpoq.

Buship naalakkersuisuutitaasalu Irakimi angusaqarpiarsimanatik kiisami uppernarsarpaat Irakimilu innuttaasut imminnut sorsuutinngujuulernerat aamma nassuerutigineqarpoq.

Amerikamiut illersornissamut ministeriat toqqaannartumik aperineqarnermi kingorna irakimi innuttaasut sorsuutinngujuulersimasut nammineq ilisimagini nassuerpoq.

Amerikamiut generaaliata Peacep amerikamiullu iraki sakkutuuisa qullersaata taamatut nassuerneq ilumuunnginnerarpaat.

Amerikamiut irakimi sakkutuuliinermut akerliusut aallaqqaataaniilli oqartuarput irakimiut shiat, sunni kurderillu imminnut sorsuutinngujoortut. Tuluit Bagdadimi aallartitarisimasaat qanittukkut tunuartoq tamatumunnga isumaqataavoq. Taassuma tuluit ministeriunerannut isertortumik allagarisimasai ippassaq nutaarsiassaqartitsivimmit BBC-mit tamanut saqqummiunneqarput.

- Irakimi innuttaasut tamat oqartussaaqataanerat tunngavigalugu inuusinnaaneri qularnarpoq imminnulli sorsuutilernissaat ilimanarneruvoq, tuluit aallartitarisimasaat ministeriunerminut taama allappoq.