Irakimi innuttaasut amerlasoorpassuit angerlarsimaffimmiinnissartik qunugaat

Irakimi pikititsiniat assigiinngitsut ukiuni pingasuni kingullerni sakkortuumik akersuuttaqattaarneri inuit inuunerinik arlalinnik naleqarpoq. Akersuunnerit allatut aamma pilliuteqarfigineqarput. Tusintilippassuit namminneq angerlarsimaffimmiinnissartik qunugaat.

- Ikinngutiga toqukkaat takugakkit tullinnguullunga nalunngilara, irakimiu Bagdadimi ingeniøri Reutersip Nutaarsiassaqartitsivianut taama oqaluttuarpoq.

Taassuma piarsuutinnguani tigusinnarlugit ilaquttanilu Sunnisiortut najungaqarfiannut qimaasimapput, kisimiinngillallu.

Shiasiortut naalaffissuat qaammatit tallimat matuma siorna qaartartumeerneqarmalli shiasiortut sunnisiortullu akiniaasaqattaanneri aallartipput inuillu 1000-init amerlanerit maannamut toqunneqareerput.

Shiasiortut sunnisiortullu akiniaaqattaarneri pissutaalluni innuttaasut amerlasuut najungaqarfimminnit qimaapput. Nunasiniartut ministereqarfiani oqaaseqartartoq oqarpoq ikinnerpaamik 33.000-t qimaasimanissaat ilimagigini. Nunarsuaq tamakkerlugu nunasiniartut qullersaqarfianilli ikinnerulaartut qimaasimanissaat ilimagineqarpoq tassanngaanniillu aamma nalunaarutigineqarpoq qimaasut amerlanersaat Bagdadimiit qimaasimasut.

Irakimi naalakkersuisut qimaasut ikiorniarlugit 2 million koruuninik immikkoortitsipput. Nunasiniartut qullersaqarfiata sapaatip akunneri arlalialunnguit matuma siorna Irakimi sumiiffinni sisamani nerisassanik allanillu inuup pinngitsoorsinnaanngisaanik tunioraallutik aallartipput.