Irakimi eqqissiviilliortuarsinnarput

Sunni-muslimit politiinut, Irakimilu naalakersuisuinik suleqatiginnittunut saassusseqattaalerput.
Allattoq Elisa Isaksen
septembarip 26-at 2007 17:40

Ullut kingulliit minnerpaamik quleriarlutik saassussisimapput.

Ippassaani Bakubami naalaffimmi imminut toqoriaatigaluni qaartartumeerisoqarmat Inuit 28-t toqutaapput 34-llu ikiligaallutik. Naalaffimmi sunni- aamma shia-muslimit untritilippaaluit, shia-muslimit naalaffianni tiitoqatigiillutik isumaqatigiinnialeruttortut qaartartumeerisoqarpoq. Bakubami politiit qullersaat politiillu allat aqqanillit toqutaasunut ilaapput. Nunap immikkoortortaani Guvernøri ataatsimiittunut aamma ilaasoq paarsisuminit annaanneqarpoq, taakku qalleraallutik assersormanni. Al Kaida-mik illersuisut, Irakip Naalagaaffianik imminnut taasut, pisuunerarlutik nalunaarput. Saassussineq ulluni kingullerni politiinut, Irakimilu naalakkersuisunik suleqatiginnittunut saassussinerit ilagaat. Basrami, Felujami, Mosulimi, Kirkukimi, Kut-imi, Samaaramilu aamma Naalakkersuisut, ajortumeeriniarnerillu unitsinniarlugit suleqataarusuttut ataatsimiinnerini saassunneqartarput. New York Timesimi allaaserisat naapertorlugit, saassusseqattaartut tassaapput sunni-muslimit. Saassusseqattaarnerit kingulliit aallartipput, amerikamiut Irakimi qullersaata, David Betrayasip, sapaatip akunnerani kingullermi, nalunaarusiamini oqaatigereeraalu, Amerikamiut sakkutuuisa amerlineqarnerisa kingorna ajortumeeriniat saassusseqattaarnerat killilersimaarneqarnerulersoq. Nalunaarusiaq saqqummiunneqartorlu Mesopotaniami Al Kaida, islamisiortut internetikkut nittartagaatigut nalunaarpoq, qaammat iisinginniarfik nalliussiniarlugu Irakimi naalakersuisunut suleqataasut saassunneqaqattaassasut. Irakimi naalakkersuisut ilimagaat saassusseqattaarnerit kingulliit Amerikamiut nalunaarusiaannut akerliunermik tunngaveqartut.