Irakimi aningaasanik pinerlunniat akornutaapput
Anngiortumik akiliillutik iluaqutissarsiortartunik misissuititat toqutaasarput, pinerluttut Irakip naalakkersuisuinut atassutilinnik ikiortilerlutik inuulluataarujoortut.
Irakip naalagaaffiata kukkunersiuisua taamatut amerikamiut inatsisartuinut oqarpoq.
Saddam Husseinip kisermaassilluni naalakkersuisuunerata nalaani, Iraki nappaatigisutut tillituut naalagaaffiattut ingerlavoq, kleptokrati. Maannali naalakkersuisuusut nalaanni aamma Irakip naalagaaffia tilliffigineqarsimaqaaq. 2003-mili Saddam Hussein uppisinneqarmat, Radi Hamsa al Radip oqaasii malillugit, koruunit 100 milliardit naligi tillinneqarsimapput. Al Radi eqqartuussisuuvoq, 2004-milu naalagaaffiup kukkunersiuisuatut atorfeqalerpoq, aggustimili ilaquttani ilagalugit Amerikami nunasipput. Al Radi Amerikamiut inatsisartuinut ippassaq oqaluttuarpoq, Irakimi pinerlunniat qunusaaralutik, persuttaasarlutik toqutsisarlutillu, qulaajaaniartut anngiortumik akiliillutik iluaqutissarsiortartut akiorniaraluarnerat iluatsinngitsoortissimagaat. Al Radi ilanngullugit eqqaavai sulisumi ilaat 31-it taakkualu ilaqutaat aqqaneq marluk toqutaasimasut, naalakersuisunullu qanittumik atassuteqartut pinerluttunik illersuisartut. Al Radi oqaluttuarpoq maanna naalakersuisut siulittaasuata Al Malakip pinerluttunut ilaasarnersoq uppernarsarsinnaanagu, ilaquttaminilli pinerluttunik ikiuisartoq oqaatigaa, Irakimilu Angallannermut ministeriusimasoq immikkut assersuutitut eqqaallugu. Tillinniarnerilli siorna ima ingasatsigilersimapput allaat uuliamik akuiaafiit annersaasa ilaannik Al Malakip sakkutuut paarsitittariaqalersimallugit. Oqartoqarsinnaanngikkaluarpoq Amerikamiut aningaasaataannik tilligartut, inatsisartulli arlallit apeqqusiipput; naalakkersuisut taamaattut ikiorniarnerini amerikamiut sakkutuui pilliutigissallugit tulluartuunersoq. Republikanererli Thomas M. Davis oqarpoq, unaannaq isigalugu iluarsiisoqartariaqanngitsoq, anngiortumik akiliillutik iluaqutissarsiortarneq amerikamiut eqqussarinngimmassuk, amerikamiullu Iraki qimareersimalerpassuk suli pinerlunnerit ingerlanneqarumaarmata.
